राज्यात वेगाने करोना पसरणाऱ्या शहरांमध्ये नाशिक पहिल्या क्रमांकावर असल्याने मुख्यमंत्री उद्धव ठाकरे थेट करोना नियंत्रणासाठी नाशिकमध्ये येत असून, ते शुक्रवारी (दि. १९) बैठक घेणार असल्याची माहिती सूत्रांनी दिली. यामुळे महापालिका प्रशासनासह जिल्हा प्रशासन कामाला लागले असून, मुख्यमंत्र्यांसमोर आढावा सादर करण्यासाठी अधिकाऱ्यांची धावपळ सुरू झाली आहे.
जानेवारीत नाशिकची वाटचाल करोनामुक्तीच्या दिशेने सुरू झाली असतानाच करोना संपल्याच्या अविर्भावात नागरिकांनी बाजारपेठा, लग्न समारंभ आणि अन्य सार्वजनिक कार्यक्रमांमध्ये मास्क, सॅनिटायझर आणि सुरक्षित अंतराच्या त्रिसूत्रीची पायमल्ली करत गर्दी केली. यामुळे करोना पुन्हा एकदा परतला. गेल्या पंधरा दिवसांत शहरात जवळपास १० हजारांपेक्षा अधिक करोनाबाधित रुग्ण वाढल्याने प्रशासनाची चिंता वाढली आहे. देशात करोना सर्वाधिक वेगाने पसरणाऱ्या दहा शहरांमध्ये नाशिक सातव्या क्रमांकावर आहे. त्यामुळे महापालिका प्रशासन ‘अॅक्शन मोड’वर आले असून मास्क, सॅनिटायझर आणि सुरक्षित वावरच्या काटेकोर अंमलबजावणीसाठी कडक कारवाई केली जात आहे.केंद्र सरकारने महाराष्ट्रात दुसऱ्या लाटेची घोषणा केल्यानंतर मुख्यमंत्री ठाकरेही आता करोना नियंत्रणासाठी मैदानात उतरणार आहेत. मुंबईनंतर ठाकरे उद्या, शुक्रवारी (दि. १९) नाशिकमध्ये करोनासंदर्भातील आढावा बैठक घेणार आहेत. त्यासाठी महापालिका प्रशासनासह जिल्हा प्रशासन कामाला लागले असून, मुख्यमंत्र्यांसमोर सध्याची स्थिती आणि उपाययोजनांच्या माहितीची जमवाजमव सुरू झाली आहे. जिल्हाधिकारी कार्यालय आणि महापालिकेकडून मुख्यमंत्र्यांसमोर वस्तुस्थिती सादर केली जाणार आहे. त्यामुळे यासाठी दोन्ही कार्यालयात अधिकाऱ्यांची धावपळ सुरू झाली आहे.
मुख्यमंत्री ठाकरे यांच्या दौऱ्याच्या पार्श्वभूमीवर पालकमंत्री छगन भुजबळ हे आज, गुरुवारी (दि. १८) सकाळी नाशिक जिल्ह्यातील करोनास्थितीचा आढावा घेणार आहेत. भुजबळ हे नुकतेच करोनामुक्त झाले आहेत. त्यामुळे तीन आठवड्यानंतर भुजबळ प्रथमच जिल्ह्यातील करोनास्थितीचा आढावा घेणार आहेत. या आढावा बैठकीनंतरच मुख्यमंत्र्यांच्या दौऱ्याची घोषणा केली जाण्याची शक्यता आहे.