नेरुळ भागात राहाणाऱ्या एका बारबालेच्या घरामध्ये दोघा व्यक्तींनी घुसून तिला लाकडी बांबूने बेदम मारहाण करून पलायन केल्याची घटना उघडकीस आली आहे. रोशन मस्कर आणि प्रतीक अशी या दोघांची नावे असून नेरुळ पोलिसांनी त्यांच्याविरोधात मारहाणीचा गुन्हा दाखल करून त्यांचा शोध सुरू केला आहे.
घटनेतील जखमी बारबाला नेरुळ भागात एकटीच राहत असून ती पनवेलमधील एका बारमध्ये काम करते. ती काम करत असलेल्या बारमध्ये नियमित जाणाऱ्या रोशन मस्कर याची त्याच बारमधील अन्य एका बारबालेसोबत चांगली मैत्री होती. मात्र मागील काही दिवसांपूर्वी रोशन व तिच्यात भांडण झाले होते. यात नेरुळमधील या बारबालेनेचे चुगली केल्याचा रोशनला संशय होता. त्यामुळे रोशनने भांडण काढून तिला बघून घेण्याची धमकी दिली होती.
गत शुक्रवारी रात्री बारबाला आपल्या कामावर गेली असताना रोशन आणि त्याचा मित्र प्रतीक हे दोघे सदर बारमध्ये गेले होते. मध्यरात्रीनंतर बारबाला नेरुळ येथील आपल्या घरी गेल्यानंतर ते दोघे तिच्यामागे नेरुळ येथे पोहोचले आणि जबरदस्तीने घरात घुसून बांबूने मारहाण केली. तिने रुग्णालयात उपचार घेऊन नेरुळ पोलिस ठाण्यात तक्रार दाखल केली. त्यानुसार पोलिसांनी रोशन मस्कर व त्याचा साथिदार प्रतीक या दोघांविरोधात गुन्हा दाखल करून त्यांचा शोध सुरू केला आहे.