स्वस्तामध्ये डॉलर्स देण्याच्या बहाण्याने दोन लाख रुपयांना गंडा घातल्याची घटना साकीनाका परिसरात घडली आहे. पैसे घेऊन एका चालकाला कागदाचे रोल देण्यात आले. फेब्रुवारी महिन्यातही अशाच प्रकारे पाच लाखांची फसवणूक करण्यात आली होती. त्यामुळे या घटनांमागे एकच टोळी असावी असा संशय पोलिसांना आहे.
पंचतारांकित हॉटेलमध्ये राहणाऱ्यांना भाड्याने वाहने पुरविणाऱ्या कंपनीत नोकरी करणाऱ्या चालकाला साकीनाका परिसरात एक अनोळखी व्यक्ती भेटली. बोलता बोलता या व्यक्तीने, माझ्या मित्राकडे ५ हजार अमेरिकन डॉलर असल्याचे या चालकाला सांगितले. या डॉलरचे पैशात रूपांतर करायचे आहे. पैशांची गरज असल्याने बाजारभावापेक्षा कमी किंमतीत तो डॉलर विकणार असल्याचे त्याने सांगितले.
दोन दिवसांनी चालकाच्या मोबाइलवर दुसऱ्या व्यक्तीचा फोन आला. चालकाने डॉलरसंदर्भात आपल्या कंपनी मालकाला कल्पना दिली. स्वस्तात डॉलर्स मिळत असल्याने कंपनीनेदेखील तयारी दर्शवली. त्यानुसार तीन तरूण ५ हजार डॉलर घेऊन चालकाला भेटले. पिशवीतील काही डॉलर काढून दाखविल्यानंतर या डॉलरसाठी तीन लाख रूपये देण्याचे ठरविण्यात आले. त्यापैकी दोन लाख त्या ठिकाणी तर उर्वरीत १ लाख रूपये कंपनीच्या कार्यालयात देण्यात येणार होते. त्यानुसार दोन लाख रूपये दिल्यानंतर तीन व्यक्तींनी डॉलर भरलेली बॅग चालकाला दिली. उर्वरीत पैसे घेण्यासाठी कार्यालयात येतो असे सांगून ते निघून गेले. डॉलर्सची पिशवी घेऊन चालक कार्यालयात आला. मालकासमोर पिशवी उघडली तेव्हा पिशवीमध्ये कागदाचे बोळे आढळले. फसवणूक झाल्याचे लक्षात येताच चालक आणि त्यांच्या कंपनीने साकीनाका पोलिस ठाण्यात तक्रार केली.