करोना संकटाच्या काळात घेण्यात येत असलेल्या ऑनलाइन क्लास आणि होमवर्कला कंटाळून एका आठवीत शिकणाऱ्या विद्यार्थिनीने गळफास घेऊन आत्महत्या केल्याची धक्कादायक घटना गुजरातमधील राजकोटमध्ये घडली आहे. मुलीच्या आईने अभ्यास करण्यासाठी सांगितल्यानंतर ती आंघोळ करायची असल्याचे सांगून खोलीत गेली आणि गळफास घेऊन जीवन संपवले.
करोना संकटाच्या काळात चार भिंतींच्या आत बसलेल्या मुलांना सध्या ऑनलाइन शिक्षण घ्यावे लागत आहे. मात्र, राजकोटमध्ये एका आठवीत शिकणाऱ्या विद्यार्थिनीने ऑनलाइन क्लास आणि दिल्या जाणाऱ्या होमवर्कला कंटाळून आत्महत्या केल्याची घटना घडली आहे. पोलिसांच्या माहितीनुसार, मुलीच्या आईने तिला शाळेने दिलेला अभ्यास पूर्ण करण्यास सांगितले. त्यानंतर मुलगी आंघोळ करायची आहे असे सांगून खोलीत निघून गेली. बराच वेळ झाला तरी ती बाहेर आली नाही. त्यामुळे तिची आई खोलीत गेली. तेथील दृश्य पाहिल्यानंतर तिला धक्काच बसला. मुलगी लटकलेल्या स्थितीत आढळून आली. तिला तातडीने रुग्णालयात घेऊन गेले. तेथील डॉक्टरांनी तिला मृत घोषित केले.
मुलगी अभ्यासात हुशार होती आणि ती सातवी इयत्तेत ७२ टक्के गुण मिळवून उत्तीर्ण झाली होती, असे शाळेच्या प्राचार्यांनी सांगितले. सरकारच्या मार्गदर्शन सूचनांनुसार, दहा दिवसांपूर्वीच ऑनलाइन क्लास सुरू करण्यात आले होते. कुणीही विद्यार्थ्याने दीड तासापेक्षा अधिक वेळ ऑनलाइन क्लाससाठी बसू नये असे आम्ही आवाहन करतो. शिक्षकांकडूनही व्हॉट्सअॅपच्या माध्यमातून मार्गदर्शन करणारे १५ ते २० मिनिटांचे व्हिडिओ विद्यार्थ्यांना पाठवण्यात येत आहेत, असेही प्राचार्यांनी सांगितले.
मावडी परिसरात ती आईवडील आणि ७ वर्षाच्या भावासोबत राहत होती. वडिलांचा ऑटो गॅरेज आहे. तसेच वाहन विक्रीचा व्यवसायही आहे. लॉकडाउनमुळे व्यवसाय ठप्प झाला होता. मात्र, आर्थिक अडचणीत असतानाही त्यांनी ऑनलाइन क्लाससाठी मुलीला स्मार्टफोन घेऊन दिला होता.