रुग्णालय प्रशासनाने यासंदर्भात माहिती देताना सांगितले की, डॉक्टरांपैकी साठ जणांची प्रकृती सुधारत असून आता केवळ तीस डॉक्टरांवर वैद्यकीय उपचार सुरू आहेत. इतर कर्मचारी, परिचारिका यांची संख्या ही एकशे नव्वदहून अधिक असल्याचे प्रशासनाने मान्य केले. त्यांच्यामध्येही प्रकृती सुधारण्याचे प्रमाण चांगले आहे. तसेच त्यांच्या आरोग्यास धोका नसून रुग्णालयात त्यांना वैद्यकीय उपचार दिले जात आहेत.
नायर रूग्णालय हे जरी करोना रूग्णालय असले तरीही रुग्णसंख्या वाढीचा ताण हा लो. टिळक रुग्णालयावरच येत आहे. रुग्णालयात तीनशेहून अधिक करोना रुग्णांवर उपचार सुरू आहेत. धारावी येथील रुग्णांची संख्या आता नियंत्रित झाली असली तरी इतरही ठिकाणांहून येणाऱ्या रूग्णांचे प्रमाण मात्र कमी झालेले नाही. त्यामुळेच रुग्णांकडून होणाऱ्या संसर्गाचे प्रमाण वाढते असल्याचे निवासी डॉक्टरांनी सांगितले.
येथे येणाऱ्या रुग्णांना उपचार नाकारले जात नाही. खाटांची उपलब्धता नसली तरीही उपचार सुरू केले जातात. आता डॉक्टरही थकल्यामुळे नवीन टीम रुजू होण्याची गरज असल्याचे निवासी डॉक्टरांनी सांगितले.
कर्मचाऱ्याचे निधन
रुग्णालयाच्या शस्त्रक्रिया विभागात काम करणारे नरेश लोखंडे यांचे करोनामुळे निधन झाले. ते अवघे ३५ वर्षांचे होते. विद्यार्थी डॉक्टरांमध्ये अतिशय प्रिय असलेले लोखंडे शस्त्रक्रिया विभागामध्ये काम करणाऱ्या डॉक्टरांना हक्काने स्वतःच्या डब्यातले जेवण खाऊ घालत. घरापासून दूर असलेल्या या विद्यार्थ्यांना धीर देत. त्यांच्या निधनामुळे रुग्णालयात हळहळ व्यक्त करण्यात येत होती. दोन आठवड्यांपूर्वी लोखंडे यांच्या वडिलांचेही करोनामुळे निधन झाले होते.
नियंत्रणासाठी प्रयत्न
सध्या रुग्णालयातील वॉर्ड ७ हा कर्मचाऱ्यांवरील उपचारांसाठी राखीव ठेवण्यात आला आहे. यापूर्वी लो. टिळक रुग्णालयातील निवासी डॉक्टर वसतिगृहाच्या एका खोलीत किमान तीन ते चार जण राहत होते. त्यामुळे दिवसभर वेगवेगळ्या ठिकाणी ड्यूटी आल्यानंतर संसर्गाची शक्यता वाढत होती. ‘मटा’ने यासंदर्भात बातमी दिल्यानंतर या विद्यार्थ्यांची व्यवस्था दादरमधील हॉटेल्स तसेच इतर ठिकाणी करण्यात आली आहे. वसतिगृहातील एका खोलीमध्ये दोनपेक्षा अधिक विद्यार्थ्यांना राहण्यास परवानगी देण्यात आली आहे. त्यामुळे यापूर्वी वसतिगृहातून करोना संसर्गाचा असलेला धोका आता नियंत्रणात आला आहे.
प्लाझा थेरपी लवकरच
रुग्णालयामध्ये प्लाझ्मा थेरपी सुरू करण्यात येणार आहे. करोनावर मात करून बऱ्या झालेल्या रूग्णांनी रक्तदान केल्यानंतर त्यांना रुग्णालयातून डिस्चार्ज देण्यात येतो. रक्तदान करण्यापूर्वी त्यांचे समुपदेशन केले जाते. प्लाझ्मा थेरपी त्यामुळे लवकर सुरू होण्यासाठी मदत होईल, असे प्रत्यक्ष वॉर्डमध्ये काम करणाऱ्या डॉक्टरांनी स्पष्ट केले.