राजस्थानच्या बाडमेरमध्ये जात पंचायतीनं तुघलकी फर्मान सुनावल्याची खळबळजनक घटना समोर आली आहे. जात पंचायतीनं बलात्कार पीडिता आणि तिच्या कुटुंबीयांवरच सामाजिक बहिष्कार टाकला आहे. तसंच पाच लाख रुपयांचा दंड ठोठावला आहे. त्यामुळं सर्व स्तरांतून संताप व्यक्त केला जात आहे.
बाडमेर जिल्ह्यात बलात्कार प्रकरणात तक्रार मागे घेतली नाही म्हणून कथित जात पंचायतीनं पीडिता आणि त्यांच्या कुटुंबीयांवर सामाजिक बहिष्कार टाकून त्यांचा अन्न-पाणी न देण्याचे फर्मान सोडले आहेत. इतकंच नाही तर त्यांना ५ लाखांचा दंड ठोठावला आहे. या तुघलकी फर्मानच्या विरोधात सर्व स्तरांतून संताप व्यक्त केला जात आहे. पीडितेच्या कुटुंबीयांनी न्याय मिळावा म्हणून पोलीस अधीक्षकांकडे धाव घेतली आहे. त्यानंतर पोलीस अधीक्षकांनी आरोपी पंचांच्या विरोधात गुन्हा दाखल करण्याचे निर्देश दिले आहेत.
मिळालेल्या माहितीनुसार, बाडमेर जिल्ह्यातील गुडामालानी पोलीस ठाण्याच्या हद्दीतील ही घटना आहे. एका गावातील पीडितेनं आपबीती सांगितली. २२ जानेवारीला ती घरी एकटीच होती. त्याचवेळी अणखिया येथील दिनेश उर्फ देवाराम जाट घरात घुसला. त्यानं धमकावून बलात्कार केला. याबाबत वाच्यता केल्यास ठार मारेन, असं धमकावलं. मात्र, तिनं न घाबरता गुडामालानी पोलीस ठाण्यात आरोपीविरोधात तक्रार दाखल केल्यानंतर त्याच्यावर बलात्काराचा गुन्हा नोंदवला. त्याला अटकही झाली.