करोनाविरोधातील लढ्यात जीवाची पर्वा न करता अहोरात्र पहारा देणाऱ्या मुंबई पोलीस दलातील दोघांचा करोनामुळं मृत्यू झाला आहे. त्यामुळं करोनाने आतापर्यंत मुंबई पोलीस दलातील आठ जणांचा मृत्यू झाला आहे. तर राज्यात हा आकडा ११ वर पोहोचला आहे.
शाहूनगर पोलीस ठाण्यात कार्यरत असलेल्या सहायक पोलीस निरीक्षकासह मोटार परिवहन विभागातील सहायक फौजदार यांचा करोनाच्या संसर्गामुळे मृत्यू झाला. मुंबई पोलीस दलाकडून ट्विटद्वारे ही माहिती देण्यात आली. मुंबई पोलीस दलानं या दोन्ही ‘योद्ध्यां’ना श्रद्धांजली वाहिली आहे. मोटार परिवहन विभागात सहायक फौजदार असलेले सहायक पोलीस उपनिरीक्षक हे ५७ वर्षांचे होते. ते गेल्या पंधरा दिवसांपासून रजेवर होते, अशी माहिती मुंबई पोलिसांनी दिली.
दरम्यान, मुंबईत करोनाचा प्रादुर्भाव वाढत आहे. मुंबई पोलीस दलातील आठ कर्मचाऱ्यांचा आतापर्यंत मृत्यू झाला आहे. तर राज्यातील ही संख्या ११वर पोहोचली आहे. करोनाला रोखण्यासाठी राज्यात लॉकडाऊन जाहीर करण्यात आला आहे. लॉकडाऊनच्या काळात मुंबई पोलिसांसह राज्यातील पोलीस अहोरात्र मेहनत घेत आहेत. आपल्या आरोग्याची पर्वा न करता ते ठिकठिकाणी पहारा देत आहेत. सेवा आणि कर्तव्य बजावताना पोलिसांनाही करोनाचा विळखा पडला आहे. राज्यात करोनाबाधित पोलिसांची संख्या हजाराच्या वर पोहोचली आहे. राज्यातील करोनाबाधितांमध्ये १००हून अधिक पोलीस अधिकारी आणि ९०० हून अधिक पोलीस कर्मचाऱ्यांचा समावेश आहे. खबरदारी म्हणून गेल्या महिन्यापासून मुंबई पोलीस दलातील ५५ वर्षांवरील पोलिसांना रजेवर पाठवण्यात आले आहे. शिवाय ज्या पोलिसांना आजार आहेत, त्यांनाही रजा घेण्यास सांगितले आहे.