महापालिकेच्या रुग्णालयातील कोरोनाबाबतची अत्यावश्यक सेवा लक्षात घेता कायमस्वरूपी पदावरील डॉक्टर, नर्स तसेच चतुर्थश्रेणी पदावरील कर्मचारी वारंवार अनुपस्थित राहत असल्यास अशा सर्व कर्मचाऱ्यांना तत्काळ नोटीस काढण्याची सूचना महापौर किशोरी पेडणेकर यांनी प्रमुख रुग्णालयातील अधिष्ठाताना मंगळवारी दिल्या.
पालिकेच्या प्रमुख रुग्णालयातील सर्व अधिष्ठातांची आढावा बैठक महापौर व आरोग्य समिती अध्यक्ष अमेय घोले यांच्या उपस्थितीत मंगळवारी राणीबागेत झाली. प्रमुख रुग्णालयातील मृतदेहांची ताबडतोब विल्हेवाट लावणे आवश्यक असून संबंधित पोलिस स्टेशनबाबत काही अडचण असल्यास रुग्णालयनिहाय यादी सादर करण्याची सूचना त्यांनी केली. पोलिस आयुक्तांसोबत चर्चा करून हा प्रश्न कायमस्वरूपी निकाली काढणार असल्याचे महापौरांनी यावेळी सांगितले. त्याचप्रमाणे रुग्णवाहिकांची विभागनिहाय कशाप्रकारे व्यवस्था करण्यात आली याची सविस्तर माहिती महापौरांनी जाणून घेतली. पुढील काळात पालिकेने रुग्णवाहिकांची स्वतः खरेदी करण्याची सूचना महापौरांनी केली.
पालिकेतर्फे विभागनिहाय २६ ‘आपली चिकित्सा’ केंद्रे सुरू करण्यात आल्याची माहिती पालिकेच्या कार्यकारी आरोग्य अधिकारी डॉ. पद्मजा केसकर यांनी दिली. मुंबईच्या विविध स्मशानभूमीतील विद्युत दाहिनी बंद असल्याचा मुद्दा महापौरांनी यावेळी उपस्थित केला. बहुतांश विद्युतदाहिनी सुरू करण्यात आले असल्याचे माहिती डॉ. केसकर यांनी सांगितले