राज्यातील नागरिकांना त्यांच्या घरी जाण्यासाठी आजपासून मोफत एसटी सोडण्यात येणार असल्याची घोषणा परिवहन मंत्री अनिल परब यांनी केली होती. मात्र सरकारच्या या घोषणेचे तीन तेरा वाजले आहेत. नालासोपारा एसटी आगारात जमललेल्या प्रवाशांना तुम्हाला गावाला जाण्यासाठी एसटीतून मोफत प्रवास करता येणार नाही, असं सांगितलं जात आहे. मोफत प्रवासाची सुविधा राज्यातील नागरिकांसाठी नसून परराज्यातील नागरिकांसाठी आहे, असं सांगत या प्रवाशांकडून डबल भाडं आकारण्यात येत आहे. त्यामुळे प्रवाशांमधून संताप व्यक्त होत असून नालासोपारा एसटी डेपोत एक ते दीड हजार प्रवाशांनी गर्दी केली आहे.
राज्यातील नागरिकांना त्यांच्या गावाकडे जाण्यासाठी एसटीने मोफत प्रवास करण्याची सोमवारपासून सुविधा मिळणार असल्याचं सांगण्यात आल्यानंतर आज अनेक डेपोंमध्ये नागरिकांनी गर्दी केली आहे. नालासोपारा पश्चिमेलाही एसटी आगारात आज हजारो प्रवाशांनी सकाळीच गर्दी केली. अनेकांच्या हातात २२ जणांची यादी होती. मात्र एसटी डेपोत आल्यानंतर त्यांना वेगळच चित्रं पाह्यला मिळालं. आम्ही डेपोत आल्यावर तुम्हाला एसटीने मोफत प्रवास करता येणार नाही. ही सुविधा राज्यातील नागरिकांसाठी नसून परराज्यातील नागरिकांसाठी आहे. तुम्हाला तुमच्या गावाला जायचे असेल तर डबल भाडं आकारावं लागेल, असं आम्हाला डेपोतून सांगण्यात आल्याचं मंगशे चव्हाण या प्रवाशाने सांगितलं. आम्ही गावाला जाण्यासाठी एकेरी भाडं भरायला तयार आहोत. कारण आम्हाला गावाला जायचं आहे. लगेच परत यायचं नाही. त्यामुळे फक्त जाण्याचं भाडं आम्ही द्यायला तयार असतानाही आम्हाला डबल भाडे मागितलं जात आहे, असंही चव्हाण याने सांगितले.
या डेपोत लांजा, रायगड, चिपळूण आणि रत्नागिरीकडे जाणाऱ्यांची मोठी गर्दी झाली आहे. गावाला जाणाऱ्यांकडून एका किलोमीटरला ४४ रुपयांच्या हिशोबाने भाडे आकारले जात आहे. नालासोपाऱ्यापासून रायगडल १९८ किलोमीटर आहे. त्यामुळे किलोमीटरला ४४ रुपयांच्या हिशोबाने एका व्यक्तीचे ४०० रुपये भाडे होते. मात्र नालासोपारा डेपोतून ८०० रुपये आकारले जात आहे. एरव्ही आम्ही ३९० रुपये भाडे देऊन रायगडला जातो, असं दुसऱ्या एका प्रवाशाने सांगितले. तर चिपळून, लांजाला जाण्यासाठी जिथे एकेरी भाड्याचा १२०० रुपये खर्च येतो तिथे २४०० रुपये आकारले जात आहेत. मोफत प्रवास देता येत नसेल तर हरकत नाही, पण डबल भाडे तरी आकारू नका, असा संताप या प्रवाशांनी व्यक्त केला आहे.