‘नाग नदी स्वच्छ झाली आहे. आता या नदीचे पाणी पिण्यायोग्य झाले आहे, महापालिका आयुक्त तुकाराम मुंढे’ , अशा आशयाचा चुकीचा संदेश समाज माध्यमांवर व्हायरल करणाऱ्या दोन युवकांना गुन्हे शाखेच्या सायबर सेलने अटक केली. आदित्य मुकेश तराळे (वय २०, रा. बोरिकर ले-आऊट ) व राहुल बुद्धरत्न ताकसांडे (वय २१, रा. नाईकनगर, मानेवाडा) अशी अटकेतील युवकांची नावे आहेत.
उपराजधानीत लॉकडाऊन सुरू असून, महापालिकेने नाग नदी, पिवळी नदी व पोहरा नदी स्वच्छता मोहीम सुरु केली आहे. याचाच फायदा घेत या दोघांनी एलआयटी मेम्स नागपूर या नावाने फेसबुक पेज व ट्विटर अकाऊंट उघडले. दोघांनी महापालिकेचा लोगो वापरून ‘नागपूर शहरातील नाग नदीचे प्रदूषण कमी झाले आहे. सांडपाण्याच्या कमतरतेमुळे नाग नदीचे पाणी पिण्यायोग्य झाले असून, ते उद्यापासून नागपूर शहराला पिण्यासाठी उपलब्ध करुन देण्यात येणार आहे. महापालिका आयुक्त मुंढे’, असा संदेश फेसबुक व ट्विटर अकाऊंटवर पोस्ट केला.
२३ एप्रिल ही पोस्ट व्हायरल झाली. त्यानंतर महापालिका आयुक्त तुकाराम मुंढे यांनी तक्रार करण्याचे निर्देश प्रशासनातील अधिकाऱ्याला दिले. त्यानुसार जनसंपर्क अधिकारी मनीष सोनी यांनी सदर पोलिसांत तक्रार दिली. पोलिसांनी माहिती तंत्रज्ञान कायद्यासह विविध कलमान्वये गुन्हे दाखल केले. सदर पोलिस स्टेशनचे वरिष्ठ पोलिस निरीक्षक महेश बनसोडे, सायबर सेलचे सहाय्यक निरीक्षक विशाल माने, विलास मोटे, हेडकॉन्स्टेबल विनोद तिवारी व त्यांच्या सहकाऱ्यांनी शोध घेऊन दोघांना अटक केली.