करोनाचा सामना करणाऱ्या मुंबईतील करोनाबाधित पोलिसांची वांद्रे येथील गुरुनानक रुग्णालयात स्वतंत्र व्यवस्था करण्यात यावी, अशी मागणी करतानाच करोनाबाधित पोलिसांच्या कुटुंबीयांचीही सरकारनेच जबाबदारी घ्यावी, अशी मागणी शिवसेनेचे खासदार राहुल शेवाळे यांनी केली आहे. शेवाळे यांनी मुख्यमंत्री उद्धव ठाकरे यांच्याकडे ही मागणी केली आहे.
मुंबईकरांच्या रक्षणासाठी अहोरात्र झटणाऱ्या पोलिसांमध्येही करोनाचा प्रादुर्भाव वाढताना दिसतो आहे. त्यातच करोनाबधित पोलिसांना रुग्णालयात दाखल होण्यासाठी किंवा पुढील टेस्ट करण्यासाठी बराच वेळ रुग्णालयांमध्ये ताटकळत राहावं लागल्याची माहिती समोर आली आहे. करोना संकटापासून मुंबईकरांना वाचविणारे ‘कोविड योद्धा’ म्हणजेच मुंबई पोलिसांना त्वरित उपचार मिळावा, यासाठी वांद्रे पूर्वेतील संपूर्ण ‘गुरुनानक रुग्णालय’ सज्ज करावे, अशी मागणी खासदार शेवाळे यांनी केली आहे. कलानगर परिसरातील ‘गुरुनानक रुग्णालया’त १५० बेड असून हे सुपरस्पेशालिटी रुग्णालय आहे. यामुळे मुंबई पोलिसांना मोठा दिलासा मिळू शकेल, असंही शेवाळे यांनी म्हटलं आहे.
तसेच करोनाबाधित पोलिसांच्या कुटुंबियांची जबाबदारी राज्य सरकारने घ्यावी, अशी मागणी करतानाच या कुटुंबाना अन्नधान्य, जीवनावश्यक वस्तू आणि औषधांचा पुरवठा वेळेत करणे गरजेचे असल्याचंही शेवाळे यांनी म्हटलं आहे.