कमॉडिटी बाजारात बुधवारी सोन्याच्या दरात तेजी दिसून आली. MCX वर सोन्याचा भाव २४० रुपयांनी वाढला. सध्या MCX वर सोनं ४३७१४ रुपयांवर ट्रेड करत आहे. याशिवाय चांदीच्या भावात देखील वाढ झाली आहे. चांदीचा भाव ४५८ रुपयांनी वाढून ४६८३६ रुपये प्रती किलो झाला आहे.
करोना विषाणूच्या फैलावाने झालेलं नुकसान भरून काढण्यासाठी अमेरिकेची केंद्रीय बँक असलेल्या फेडरल रिझर्व्हने मंगळवारी व्याजदरात अर्धा टक्क्याची कपात केली आहे. या निर्णयाचा परिणाम कमॉडिटी बाजारावर दिसून आला. आंतरराष्ट्रीय कमॉडिटी बाजारात सोन्याच्या किमतीत ३ टक्क्याची वाढ झाली होती. मंगळवारी तर स्पॉट गोल्ड १६४३.७६ डॉलर प्रती औंसपर्यंत वाढले. चांदीचा भाव ०.२ टक्क्यांनी वाढून १७.२१ डॉलर प्रती औंस झाला.
मागील दोन आठवड्यात भारतातील कमॉडिटी बाजारात सोन्याच्या किमतींमध्ये मोठी तेजी होती. याला मुख्य कारण करोना व्हायरसचा युरोपातील शिरकाव आहे. मात्र या तेजीचा फायदा घेत गुंतवणूकदारांनी नफावसुली केली. त्यामुळे सोने दबावात आले असल्याचं एचडीएफसी सिक्युरिटीजने म्हटलं आहे. मात्र सलग दोन सत्रात सोने आणि चांदी वधारले आहेत. मंगळवारी MCX वर सोन्याचा भाव ३.६ टक्क्याने वधारला होता. सोनं ४३४७४ रुपयांवर गेले होते.