वसई घरगुती वादातून मुलाने चक्क स्वतःच्या वडिलांवर कोयत्याने वार केल्याची घटना सोमवारी विरारमध्ये घडली. यामध्ये वडील गंभीर जखमी झाले असून त्यांच्यावर विरार येथील खासगी रुग्णालयात उपचार सुरू आहेत. विरार डोंगरपाडा येथील माँ आंबे छाया निवास, येथे परशुराम गोविंद पाटील (७३) हे परिवारासह राहतात. त्यांचा मुलगा किरण पाटील हा देखील त्यांच्यासोबत राहतो. सोमवारी सकाळी सात वाजण्याच्या सुमारास परशुराम पाटील हे बागेमध्ये फुले तोडण्यासाठी गेले होते. त्यावेळी त्यांचा मोठा मुलगा किरण पाटील याने पाठीमागे जाऊन त्यांच्यावर कोयत्याने चार ते पाच वार केले. त्यानंतर परशुराम यांनी आरडाओरड सुरू केला असता, पाटील यांची पत्नी व नातू बाहेर आले. त्यांनी रक्तबंबाळ झालेल्या परशुराम यांना रुग्णालयात दाखल केले आणि तत्काळ पोलिसांना संपर्क साधला. यामध्ये परशुराम यांनी पोलिसांना दिलेल्या जबाबात हे वार त्यांचा मुलगा किरण पाटील याने केल्याचे सांगितले. घरगुती वादातून व आणि न्यायालयातून किरण यास एक नोटीस आली होती. त्याचा राग मनात धरून किरण याने आपल्या वडिलांवरच कोयत्याने वार केल्याचे विरार पोलिसांनी सांगितले. ही नोटीस संपत्तीच्या वादातून आली असावी, असा संशय पोलिसांनी व्यक्त केला. किरणला अटक करण्यात आली.