चीनमध्ये करोनाने हाहाकार माजवल्यानंतर दक्षिण कोरियातही करोनाचा फैलाव झाला आहे. युरोपीयन देशांनीही करोनाचा धसका घेतला आहे. इटलीमध्ये करोनाचा संसर्ग अधिक होऊ नये यासाठी कठोर पावले उचलले आहेत. करोना संक्रमित विभागात प्रवेश केल्यास दंडात्मक कारवाई करण्याचे निर्देश प्रशासनाने दिले आहेत.
स्थानिक वृत्तमाध्यमांनी दिलेल्या वृत्तानुसार, इटलीमध्ये करोनाचे १५२ संशयित रुग्ण आढळले आहेत. इटली पोलिसांकडून करोना संक्रमित परिसरात पेट्रोलिंग सुरू करण्यात आले आहे. इटलीत ११ परिसर हे करोना संक्रमित परिसर असल्याची माहिती स्थानिक वृत्तसंस्थांनी दिली आहे. लोम्बार्डी परिसरात खबरदारीचे उपाय आखण्यात आले आहेत. इटलीतील जवळपास ५० हजार कुटुंबीयांना घरातून बाहेर न पडण्याच्या सूचना देण्यात आल्या आहेत. त्याशिवाय सार्वजनिक स्थळी न जाण्याचा सल्ला देण्यात आला आहे.
शाळा-दुकाने बंद
इटलीतील करोनाचा संसर्ग झालेला परिसर, करोनाचा संसर्ग होऊ शकतो अशा परिसरातील शाळा, दुकानांना बंद ठेवण्याचे आदेश देण्यात आले आहेत. व्हेनिस फेस्टिवलही रद्द करण्यात आला आहे. तर, इटालियन फॅशन डिझायनर जियोर्जिया अरमानीचा रविवारी होणारा शोही रद्द करण्यात आला आहे.
रम्यान, ऑस्ट्रियाने इटलीच्या ट्रेनला देशात प्रवेश नाकारला. या रेल्वेच्या डब्यात करोनाचे दोन संशयित रुग्ण असल्यामुळे ट्रेनला प्रवेश नाकारण्यात आला असल्याची माहिती देण्यात आली. व्हेनिस ते म्युनिचकडे येणाऱ्या ट्रेनला ऑस्ट्रियाच्या सीमेवर रोखण्यात आले.