थंडीपासून बचावासाठी पांघरायला ब्लँकेट न दिल्याने नोकराने ढाबा मालकाची हत्या केली. ही थरारक घटना देवालापारमधील वडंबा येथे मंगळवारी पहाटे ४ वाजता उघडकीस आली. प्रकाश बालगोविंद जयस्वाल (वय ५३), असे मृत ढाबा मालकाचे नाव आहे. पोलिसांनी खुनाचा गुन्हा दाखल करून मारेकरी कारा सत्यनारायणसिंग बावर (वय ३५) याला अटक केली. प्रकाश यांचा वडंबा परिसरात शिवप्रकाश नावाचा ढाबा आहे. येथे कारा हा नोकर असून तो तेथेच राहतो. मंगळवारी त्याने ढाबा मालकाला ब्लँकेट मागितले. प्रकाश यांनी त्याला ब्लँकेट दिले नाही. त्यावरून दोघांमध्ये वाद झाला. वाद विकोपाला गेला. संतप्त काराने शस्त्राने प्रकाश यांच्यावर हल्ला केला. जखमी होऊन प्रकाश यांचा मृत्यू झाला. अन्य नोकराने देवलापार पोलिसांना माहिती दिली. माहिती मिळताच पोलिसांचा ताफा तेथे पोहोचला. पोलिसांनी कारा याला अटक केली.