प्रवाशांना सर्व सोयी-सुविधा मिळाव्यात यासाठी मेट्रो रेल कार्पोरेशन लिमिटेडने कंबर कसली आहे. ऑफिस आणि घर या धावपळीत अनेकांना सलून आणि स्पामध्ये जाण्यास वेळ मिळत नाही. त्यामुळे मेट्रो स्टेशनवर प्रवाशांना सलून आणि स्पाची सुविधा देण्याचा निर्णय मेट्रो प्रशासनाने घेतला आहे. रेल्वेच्या या निर्णयामुळे प्रवाशांना मोठा दिलासा मिळणार आहे. त्याचबरोबर स्टेशनवरच सुपर मार्केट, फूड प्लाजा, बँक आणि फार्मसीची सुविधा देण्याचा निर्णयही मेट्रोने घेतला असून त्यामुळे प्रवाशांना शॉपिंगसाठी मॉल्सला जाण्याची गरज पडणार नाही.
मेट्रो स्टेशनच्या परिसरात प्रवाशांना काय काय सुविधा दिल्या जाऊ शकतात याचं भान ठेवून मेट्रो प्रशासनाने स्थानकांचं डिझाइन तयार करण्याचं काम सुरू केलं आहे. मेट्रो-३ कॉरिडोअरच्या कफ परेड, सिद्धिविनायक, बीकेसी आणि आंतरराष्ट्रीय विमानतळ या चार प्रमुख स्थानकांवर २० हजार ते ४० हजार स्क्वेअर फुटाच्या जागेवर प्रवाशांना या सुविधा दिल्या जाणार आहेत. इतर स्थानकांवर ३०० ते १००० स्क्वेअर फूटापर्यंतच्या जागेवर सुपर मार्केट, फूड प्लाझासहित अन्य सुविधा दिल्या जाणार आहेत. ज्या स्थानकावर प्रवाशांसह इतर लोकांची मोठी रेलचेल असते अशा स्थानकांवर स्पा आणि सलूनची सुविधा देण्यात येणार आहे. कफ परेड, सिद्धिविनायक, बीकेसी आणि आंतरराष्ट्रीय विमानतळ ही त्यापैकी काही स्थानके असल्याचं सूत्रांनी सांगितलं.
कुलाबा -वांद्रे -सीप्झच्या दरम्यान बांधल्या जात असलेल्या ३३ किलोमीटरच्या भूमिगत टनेलचं काम ८० टक्के पूर्ण झालं आहे. स्टेशनसहीत इतर कामे ५५ टक्के पूर्ण झाली आहेत. मेट्रो प्रशासनाने कफ परेड स्टेशन आणि सिद्धिविनायक स्टेशनवरील काही जागा भाड्याने देण्याचा या आधीच निर्णय घेतला आहे. डिसेंबर २०२१ पर्यंत मेट्रोचा पहिला टप्पा सुरू करण्यात येणार असून जून २०२२पर्यंत या संपूर्ण मार्गावर मेट्रो धावणार आहे.
मेट्रो स्टेशनवर या सुविधा मिळणार
>> सलून
>> स्पा
>> फूड स्टॉल
>> एटीएम
>> सुपर मार्केट
>> बँक
>> फूड कोर्ट
>> बँक
>> फार्मसी