आपली खोटी प्रतिष्ठा राखण्यासाठी करण्यात आलेल्या हत्येच्या एका प्रकरणान मेरठमध्ये खळबळ उडवून दिली आहे. आपल्या चुलत बहिणीचे एका मुलावर प्रेम असल्याचे समजल्यानंतर खवळलेल्या चुलत भावाने आपल्या बहिणीच्या गुप्तांगातच गोळी झाडली. या हल्ल्यात तिचा मृत्यू झाला. टीना चौधरी असे या मुलीचे नाव असून ती इयत्ता १२वीत शिकत होती.
ही घटना घडल्यानंतर कुटुंबीयांनी हे प्रकरण पुढील तीन तास लपवून ठेवले अशी माहिती स्थानिक पोलिसांनी दिली. पीडित मुलीला हॉस्पिटलमध्ये दाखल झाल्यानतर या घटनेची पोलिसांनी माहिती मिळाली. सुरुवातीला आमच्या घरात दरोडा पडल्याचे कुटुबीयांनी सांगितले. हत्यारे घेऊन दरोडेखोरांनी हल्ला केल्याची कुटुंबीय सांगत होते. दरम्यानच्या काळात मृत मुलीच्या कुटुंबीयांनी सर्व पुरावे नष्ट करण्याचा प्रयत्न केला. शवविच्छेदन अहवालानुसार, मृत मुलीला तीन गोळ्या लागल्या आहेत. एक गोळी मांडीच्या आतल्या भागात लागली आहे. दुसरी गोळी गुप्तांगात, तर तिसरी गोळी कमरेच्या वर लागली आहे.
पोलिसांनी मृत मुलीचा चुलत भाऊ प्रशांत, त्याचे आई-वडील आणि मृत मुलीच्या आई-वडिलांविरोधात गुन्हा नोंदवला आहे. घटनास्थळी रक्त साचलेले पाहता मृत मुलीवर त्याच ठिकाणी गोळ्या झाडण्यात आल्याचे स्पष्ट होत असल्याचे ग्रामीणचे पोलीस अधीक्षक अविनाश पांडे यांनी माहिती देताना सांगितले. घटनास्थळी तुटलेल्या बांगड्याही सापडल्या आहेत. या वरून मुलीने त्या क्षणी प्रतिकार केला असल्याचे स्पष्ट होते, असेही पांडे म्हणाले. पोलिसांनी मुख्य आरोपी प्रशांत, मुलीचे आई-वडील, भाऊ आणि चुलत्याला अटक केली आहे.