अलिबाग येथील वैद्यकीय महाविद्यालयात शिक्षण घेणाऱ्या विद्यार्थिनीला लग्नाचे आमिष दाखवून एका तरुणाने तिच्यावर लैंगिक अत्याचार केल्याचे उघडकीस आले आहे. याप्रकरणी गुन्हा दाखल करण्यात आला असून पोलिस आरोपीचा शोध घेत आहेत.
पीडित मुलगी व आरोपी हे दोघेही मुंबईतील कांदिवली येथील रहिवासी असून आरोपीचे लग्न झालेले आहे. पीडित तरुणी अलिबागमधील होमिओपॅथिक वैद्यकीय महाविद्यालयात तिसऱ्या वर्षामध्ये बी. एच. एम. एस.चे शिक्षण घेत आहे. ऑक्टोबर २०१७ पासून आरोपीने या तरुणीशी मैत्री करून तिला प्रेमाच्या जाळ्यात ओढले. तिला लग्नाचे आमिष दाखवून तिच्याशी शारीरिक संबंध ठेवले. आरोपीचे लग्न झालेले असतानाही लग्नाचे आमिष दाखवून लैंगिक अत्याचार केल्याप्रकरणी या तरुणीने अलिबाग पोलिस ठाण्यात फिर्याद दाखल केली आहे.