कापुरबावडी परिसरातील लेक सिटी मॉलला आज, शनिवारी दुपारच्या सुमारास भीषण आग लागली. आगीची माहिती कळताच अग्निशमन दलाचे बंब घटनास्थळी पोहोचले. शर्थीच्या प्रयत्नानंतर आग आटोक्यात आणण्यात आली. मॉलमधील चौथ्या मजल्यावर अडकलेल्या एकाला वाचवण्यात अग्निशमन दलाला यश आलं.
ठाणे पश्चिमेकडील लेक सिटी मॉलच्या पहिल्या मजल्यावर दुपारच्या सुमारास भीषण आग लागली. या आगीच्या घटनेची माहिती अग्निशमन दलाला मिळताच, अग्निशमन बंब आणि बचावपथक घटनास्थळी पोहोचले. शर्थीच्या प्रयत्नानंतर अग्निशमन दलानं आगीवर नियंत्रण मिळवलं. या मॉलच्या चौथ्या मजल्यावर नामदेव झोरे हे अडकले होते. अग्निशमन कर्मचाऱ्यांनी त्यांना सुखरूप बाहेर काढले. आग आटोक्यात आणण्यात यश मिळालं आहे. या आगीच्या घटनेत कोणतीही जीवितहानी अथवा कुणीही जखमी झाला नाही, अशी माहिती अग्निशमन अधिकाऱ्यांनी दिली.