सामान्य ग्राहकांना महागाईचा पुन्हा एकदा झटका बसलाय. सर्व महानगरांत घरगुती इण्डेन गॅसच्या दरांत पुन्हा एकदा वाढ घोषित करण्यात आलीय. इंडियन ऑईलनं विना अनुदानित १४ किलो गॅस सिलिंडरच्या किंमतीत १४४.५० रुपयांपासून १४९ रुपयांपर्यंत वाढ जाहीर केलीय. ही वाढ आजपासून लागू झालीय. यापूर्वी, १ जानेवारी २०२० रोजी घरगुती गॅसच्या किंमतींत वाढ घोषित करण्यात आली होती.
अर्थातच, आर्थिक राजधानी मुंबईत आता विना अनुदानित घरगुती गॅस सिलिंडरसाठी ८२९.५० रुपये मोजावे लागणार आहेत. मुंबईत गॅसच्या किंमतीत १४५ रुपयांची वाढ करण्यात आलीय. तर राजधानी दिल्लीत सिलिंडरच्या किंमतीत १४४.५० रुपयांची वाढ करण्यात आलीय. दिल्लीत आता १४ किलोच्या गॅस सिलिंडरसाठी ८५८.५० रुपये मोजावे लागणार आहेत.
भाववाढीनंतर कोलकातामध्ये नागरिकांना १४९ रुपये जास्त मोजून ८९६ रुपयांना गॅस सिलिंडर विकत घेता येईल तर चेन्नईमध्ये १४७ रुपयांच्या वाढीसहीत गॅस सिलिंडरचे दर ८८१ रुपयांवर पोहचले आहेत.
उल्लेखनीय म्हणजे, सबसिडी आणि बदलत जाणाऱ्या बाजार भावानुसार घरगुती गॅसच्या किंमतीतही बदल होतो. फेब्रुवारी महिन्याच्या सुरुवातीला या दरांत कोणताही बदल झालेला नव्हता. १ फेब्रुवारी रोजी सादर झालेल्या अर्थसंकल्पापूर्वी व्यावसायिक गॅस सिलिंडरच्या दरांत २२४.९८ रुपयांची वाढ झाली होती. त्यामुळे सध्या व्यावसायिक वापरासाठी सिलिंडर १५५०.०२ रुपयांना मिळतोय. यावेळी घरगुती गॅसच्या किंमतीत मात्र वाढ झाली नव्हती. घरगुती गॅसचे एकूण २७.६ कोटी उपभोक्ते आहेत. यातील जवळपास दोन कोटी नागरिकांना सबसिडीचा लाभ घेता येत नाही.