गेले काही दिवस बारामती परिसरात धुमाकूळ घालणाऱ्या बिबट्यालाअखेर जेरबंद करण्यात वनविभागाच्या कर्मचाऱ्यांना यश आले आहे.बारामती तालुक्यातील कण्हेरी येथील एका शेतात लावलेल्या पिंजऱ्यामध्ये आज बिबट्या जेरबंद झाला. या बिबट्याला बारामती येथे हलविण्यात येत असून वन विभागाच्या वरिष्ठ अधिकाऱ्यांच्या निर्देशानुसार पुढील कार्यवाही केली जाणार असल्याची माहिती वनसंरक्षक जराड यांनी दिली .
गेले काही दिवसांपासून या बिबट्याने बारामती तालुक्यातील काटेवाडी , कण्हेरी, ढेकळवाडी या परिसरात धुमाकूळ घातला होता . जनावरे फस्त करण्यासोबतच त्याच्या वावराने या परिसरातील ग्रामस्थांमध्ये भीतीचे वातावरण पसरले होते.बिबट्याच्या भितीमुळे लोक शेतात जायला तयार नव्हते. आता बिबटया जेरबंद झाल्यामुळे या भागातील ग्रामस्थांनी सुटकेचा निश्वास सोडला आहे .
बारामती परिसरात बिबट्या आल्याने गेल्या काही दिवसात प्रचंड खळबळ उडाली होती . बारामती एमआयडीसीतील बाउली या कंपनीत सर्वप्रथम सीसीटीव्हीमध्ये बिबट्याचे दर्शन झाल्यानंतर या परिसरामध्ये बिबट्याचा वावर असल्याची माहिती पुढे आली. त्यानंतर वनविभागाने आवश्यक उपाययोजना करीत त्यासाठी तीन पिंजरे लावले होते. या प्रयत्नांना आता यश आले आणि बिबट्या जेरबंद झाला.