ठाणे-वाशी-पनवेल मार्गावरील प्रवाशांना आज, गुरुवारपासून वातानुकूलित लोकलप्रवासाचा अनुभव घेता येणार आहे. मध्य रेल्वेच्या पहिल्या वातानुकूलित लोकलला छत्रपती शिवाजी महाराज टर्मिनस येथून रेल्वे राज्यमंत्री सुरेश अंगडी यांच्या उपस्थितीत हिरवा झेंडा दाखवण्यात येईल. यावेळी मध्य आणि पश्चिम रेल्वेच्या विविध पादचारी पुलांचेदेखील लोकार्पण करण्यात येणार आहे.
प्रवाशांना गारेगार प्रवासाचा अनुभव देणाऱ्या वातानुकूलित लोकलला दुपारी अडीच वाजता हिरवा झेंडा दाखवण्यात येईल. ३१ जानेवारीपासून सोमवार ते शुक्रवार अशी आठवड्यातून पाच दिवस ही गाडी धावेल. या लोकलची पहिली फेरी पहाटे ५.४४ वाजता पनवेल-ठाणे मार्गावर होईल, तर ठाणे-पनवेल मार्गावर रात्री ९.५४ ला शेवटची फेरी असेल. या लोकलच्या एकूण १६ फेऱ्या होणार असल्याचे अधिकाऱ्यांनी सांगितले.
देशातील पहिली वातानुकूलित लोकल २५ डिसेंबर २०१७ला पश्चिम रेल्वेवर धावली. या लोकलमध्ये आपत्कालीन परिस्थितीत काम करण्यासाठी टॉकबॅक यंत्रणा आहे. मध्य रेल्वेच्या वातानुकूलित लोकलला प्रवाशांचा प्रतिसाद लाभावा, यासाठी मध्य रेल्वेने नवी मुंबईतील व्यापारी संकुलांतील कर्मचाऱ्यांशी संपर्क साधून या लोकलच्या प्रवासाला प्राधान्य देण्याचे आवाहन केले आहे.
छत्रपती शिवाजी महाराज टर्मिनस येथील प्लॅटफॉर्म क्रमांक १८वर पार पडणाऱ्या वातानुकूलित लोकलच्या शुभारंभ कार्यक्रमावेळी मध्य आणि पश्चिम रेल्वेवरील पादचारी पुलांचे लोकार्पण, घाटकोपर-कामण रोड स्थानकात नवीन बूकिंग कार्यालय, लोकमान्य टिळक टर्मिनस आणि पनवेल स्थानकात आधुनिक स्वच्छतागृहे, भायखळा आणि दादर स्थानकात नवे पंखे, दादर व ठाणे स्थानकांत नवे इंडिकेटर, सीएसएमटीमध्ये सौरपॅनल अशा सुविधांचेही लोकार्पण करण्यात येणार असल्याची माहिती मध्य रेल्वेच्या अधिकाऱ्यांनी दिली.