स्प्रे मारुन बेशुद्ध केल्यानंतर गुप्तांगात स्टील रॉड टाकल्यानंतर १९ वर्षीय तरुणीवर अत्याचार केला. क्रौर्यही हादरावे अशी ही घटना पारडी भागात उघडकीस आली आहे. तरुणीच्या तक्रारीवरून पोलिसांनी अत्याचारासह विविध कलमान्वये गुन्हा दाखल करून नराधमाला अटक केली आहे. योगिलाल रहांगडाले (वय ५२),असे अटकेतील नराधमाचे नाव आहे. देशभरात निर्भया प्रकरणावरून संताप व्यक्त होत आहे. आरोपिंना तात्काळ फाशी द्या अशी मागणी होत असतानाच हा प्रकार घडला आहे.
अनिल देशमुख यांनी गृहमंत्रिपदाचा कारभार स्वीकारुन एक महिना झाला. नागपूरची प्रतिमा बदलेल असा दावा त्यांनी केला होता. गृहमंत्र्याच्या या दाव्याला छेद देणारी खळबळजनक घटना प्रजासत्ताकदिनाच्या पूर्व संध्येला उघडकीस आली आहे. यापूर्वी नवीन कामठी भागात चाकूचा धाक दाखवून १६ वर्षीय विद्यार्थिनीवर अत्याचार करण्यात आला होता. आता पारडीत उघडकीस आलेल्या या घटनेने पोलिस दलात प्रचंड खळबळ उडाली आहे.
मिळालेल्या माहितीनुसार, पीडित तरुणी व तिचा भाऊ पारडीतील एका संस्थेत काम करतात. याच संस्थेत रहांगडाले हा पर्यवेक्षक आहे. संस्थेलगतच असलेल्या एका खोलीत पीडित तरुणी, तिचा भाऊ, अन्य एक तरुणी व रहांगडाले राहतो. २१ जानेवारीला तरुणीचा भाऊ गावाला गेला. अन्य एक तरुणीही बाहेरगावी गेली. मध्यरात्री १२ वाजताच्या सुमारास रहांगडाले खोलीत आला. त्याने तरुणीच्या चेहऱ्यावर स्प्रे मारला. ती बेशुद्ध झाली. ती बेशुद्ध होताच रहांगडालेने तिच्या गुप्तांगात स्टीलचा रॉड टाकला. त्यानंतर पहाटे ५ वाजतापर्यंत त्याने तरुणीवर अत्याचार केला व पसार झाला. सकाळी तरुणी शुद्धीवर आली. तिने आरडाओरड केली. बाजूला राहणारे कर्मचारी धावले. त्यांनी तरुणीला रुग्णालयात दाखल केले. त्यानंतर तरुणीने पारडी पोलिसांत तक्रार दिली. पोलिसांनी अत्याचाराचासह विविध कलमान्वये गुन्हा दाखल करून रहांगडाले याला अटक केली. त्याची २९ जानेवारीपर्यंत पोलिस कोठडी घेण्यात आली आहे.