भाद्रपद महिन्यातील गणेश चतुर्थी उत्सवाप्रमाणेच माघ महिन्यातील गणेश जयंतीलाही उत्सवाचे स्वरूप प्राप्त झाले असून वर्षागणिक त्यांची संख्या वाढू लागली आहे. पूर्वी केवळ मंदिरांपुरता मर्यादित असलेला हा उत्सवही सार्वजनिक गणेशोत्सवाच्या स्वरूपात साजरा होऊ लागला आहे. ठाणे, कल्याण-डोंबिवली, टिटवाळ्यासह जिल्ह्यात गणेशोत्सवाचे भव्यदिव्य स्वरूप पाहण्यास मिळू लागले आहे. भव्य आरास, सांस्कृतिक कार्यक्रमांची रेलचेल आणि सुबक मूर्तींची स्थापना त्यामुळे ठाणे जिल्ह्यात माघी गणेशोत्सवाचा जल्लोषही वाढू लागल्याचे समोर आले आहे. मोठ्या सार्वजनिक मिरवणुका नसल्या तरी उत्सवाचे स्वरूप अधिक व्यापक झाल्याचे दिसून येत आहे.
ठाण्याला सार्वजनिक माघी गणेशोत्सवाची स्वातंत्र्यपूर्व काळापासूनची परंपरा आहे. नौपाड्यातील उमा नीळकंठ व्यायामशाळेत अमृत महोत्सवी वर्ष साजरे करणारे नौपाडा माघी गणेशोत्सव मंडळ अस्तित्वात आहे. लोकमान्य टिळकांच्या प्रेरणेने १९३१ साली नौपाडा माघी गणेशोत्सव मंडळाची मुहूर्तमेढ रोवण्यात आली. इकोफ्रेंडली सजावटीसोबत सांस्कृतिक कार्यक्रमांचीही मंडळात रेलचेल असते. ठाणे पोलिस आयुक्तालयाच्या हवाल्यानुसार साधारण १२० ते १२२ सार्वजनिक तसेच ५०० ते ६०० घरगुती माघी गणपतींची स्थापना करण्यात येते. ही संख्या थोड्याफार फरकाने कमी जास्त होत असते. गणेशमूर्ती, मोदक, घरगुती सजावटींची लगबग… भाद्रपदातील गणेशोत्सवाप्रमाणे माघी महिन्यातही गणेशमूर्तींची मागणी वाढल्याने मूर्तिकारांना वर्षभर रोजगार उपलब्ध होऊ लागला आहे. मिठाई, सजावट, ज्वेलरी आणि अशा असंख्य गणपतीला प्रिय असलेल्या वस्तूंची खरेदी विक्रीलाही जोर आला आहे.
टिटवाळा येथील गणेश मंदिरा गणेश जयंतीपासून उत्सवाची सुरुवात होत असून पाच दिवसांच्या या काळात सुमारे दीड लाखाहून अधिक भाविक दर्शनाला दाखल होत असतात. लांबून येणाऱ्या पालख्या आणि भाविकांच्या दर्शनाची झुंबड या भागात उडते. याशिवाय डोंबिवली गणेश मंदिर येथेही विविध कार्यक्रमांचे आयोजन करण्यात आले आहे. याशिवाय सार्वजनिक गणेशोत्सवांचेही विविध कार्यक्रम असून सोमवारी अनेक ठिकाणी सजावटींना गती आली होती.