दिल्लीच्या मुख्यमंत्रिपदाची हॅटट्रिक साधण्यास निघालेले अरविंद केजरीवाल यांचे नवी दिल्ली विधानसभा मतदारसंघातून उमेदवारी अर्ज भरण्यातच दोन दिवस वाया गेले. सोमवारी आपल्याच रोड शोमध्ये अडकल्यामुळे निवडणूक अधिकाऱ्याच्या कार्यालयात वेळेत पोहोचू न शकलेल्या केजरीवाल यांना मंगळवारी अर्ज दाखल करण्याच्या शेवटच्या दिवशी असंख्य अपक्ष उमेदवारांमुळे तब्बल सहा तासांची प्रतीक्षा करावी लागली. केजरीवाल यांचा वेळ वाया घालविण्याचा कट भाजपने रचल्याचा आरोप सत्ताधारी आम आदमी पार्टीने केला आहे.
सोमवारी रोड शो काढून उमेदवारी अर्ज भरण्याचे प्रयत्न अंगलट आल्यानंतर मंगळवारी केजरीवाल यांनी आपले आईवडील आणि कुटुंबीयांसह निवडणूक कार्यालय गाठले. पण, तिथे उमेदवारी अर्ज स्वीकारला जाण्यापूर्वी त्यांना सहा तास प्रतीक्षा करावी लागली. केजरीवाल यांच्याआधी ४४ उमेदवार असल्यामुळे त्यांना रांगेत राहण्यावाचून पर्यायच नव्हता. अण्णा हजारे यांच्या भ्रष्टाचारविरोधी आंदोलनात केजरीवाल यांनी विश्वासघात केल्याचा आरोप करीत अनेक उमेदवार त्यांच्या विरोधात उभे राहिले आहेत. सन २०१८ मध्ये दिल्ली बस सेवेतील अडीचशे कंत्राटी कर्मचाऱ्यांना धरणे दिल्यामुळे नोकरीतून काढून टाकण्यात आले होते. त्यापैकी ३० जणांनीही मंगळवारी केजरीवाल यांच्याविरोधात उमेदवारी अर्ज दाखल केले.