ठाणे महानगर पालिकेत कारकुनाने फेसबूक लाइव्ह करत आत्महत्या केल्याची घटना घडली आहे. ही घटना सोमवारी दुपारी घडली. मंदार भोईर असे या ३५ वर्षीय कारकुनाचे नाव आहे. ‘मी आता माझे जीवन संपवत आहे’, असे म्हणत त्याने आत्महत्या केली. इतकेच नाही, तर आत्महत्येच्या आदल्या रात्री त्याने स्वत:चा फोटो पोस्ट करत स्वत:ला श्रद्धांजलीही वाहिली होती. या फोटोवर त्याने ‘भावपूर्ण श्रद्धांजली’ असे लिहिले होते.
रविवारी रात्री भोईर याने फेसबुकवर पोस्ट केलेली श्रद्धांजलीपर पोस्ट त्याच्या मित्रांनी पाहिल्यानंतर त्याला फोन करत त्यांचा दृष्टीकोन बदण्याचा प्रयत्न केला. आम्ही सर्वजण तुझ्या सोबत आहोत, असे सर्व मित्रांनी सांगत त्याला बळ देण्याचाही प्रयत्न केला. मात्र दुसऱ्या दिवशी सोमवारी सकाळी अकरा वाजता भोईरने फेसबुक लाइव्ह करत आपल्याला एकटं वाटत असल्याचं म्हटलं. कुणीही आपल्याला समजून घेणारं नसल्यानं आपण आपले आयुष्य संपवत आहोत, असं भोईर फेसबुक लाइव्हमध्ये सांगत होता. हा लाइव्ह व्हिडिओ पाहताच त्याच्या मित्रांनी त्याला तातडीने कॉल केला. मात्र, भोईर याने मित्रांचे फोनकॉल उचललेच नाहीत. त्यानंतर मित्रांनी भोईर याच्या भावाशी संपर्क साधला. त्यानंतर सर्वजण भोईरच्या घरी गेले. मात्र, कुणीही दरवाजा उघडला नाही. त्यानंतर त्यांनी पोलिसांना फोन केला. पोलीस आल्यानंतर त्यांनी दरवाजा तोडून आत प्रवेश केला. तेव्हा भोईर याने फाशी घेतल्याचे स्पष्ट झाले.
नौपाडा पोलिसांनी मात्र आकस्मिक निधनाची नोंद केली आहे. भोईर याच्या अंगावर बरीच कर्जे आहेत. त्याची पत्नी आणि सहा वर्षीय मुलगी त्याच्यासोबत राहत नाहीत. त्याच्यआ आईवडिलांचा मृत्यू झाल्यानंतर भोईर अनेक दिवसांपासून एकटाच राहत आहे.
भोईरची आई मरण पावल्यानंतर त्याला टीएमसीमध्ये कारकुनाची नोकरी मिळाली. मात्र, तो नियमीत ऑफिसला जात नसे. त्याला नैराश्यानेही गाठले होते, अशी माहिती स्थानिक समाजिक कार्यकर्ते संदीप खांबे यांनी दिली.
भोईरने दोन बाइक्स लोनवर घेतल्या होत्या, असे पोलिसांनी सांगितले. या व्यतिरिक्त त्याने अनेकांकडून उधार पैसे घेतले होते. पोलिसांना त्याच्या घरात अनेक दारूच्या बाटल्याही आढळल्या. पत्नी घर सोडून गेल्यानंतर त्याने पिणं सुरू केल्याचं पोलिसांनी सांगितलं. आपण शिवसैनिक असल्याचे भोईर सांगत असे. इतकेच नाही, तर शिवसेना नेते आनंद दिघे यांचे टॅट्यूही त्याने आपल्या छातीवर गोंदून घेतले होते.