अजय देवगणचा सिनेमा ‘तान्हाजी: द अनसंग वॉरियर’ ची घोडदौड सुरू आहे. हा सिनेमा प्रदर्शित होऊन तब्बल दोन आठवडे उलटले आहेत, तरीही सिनेमाची क्रेझ कमी झालेली नाही. परिणामी सिनेमा बॉक्स ऑफिसवर जोरदार कमाई करत आहे. दहा दिवसांत ‘तान्हाजी’ने १६२ कोटी रुपयांचा गल्ला जमा केला आहे. कमाईचा ओघ असाच राहिला तर लवकरच हा सिनेमा २०० कोटी क्लबमध्ये सामील होऊ शकतो.
छत्रपती शिवाजी महाराजांचा वीर सुभेदार तान्हाजी मालुसरे यांच्या जीवनावर हा सिनेमा आधारित आहे. अभिनेता अजय देवगण, काजोल, सैफ अली खान, शरद केळकर यांच्या या सिनेमात प्रमुख भूमिका आहेत. बॉक्स ऑफिस इंडिया डॉट कॉमनुसार दुसऱ्या आठवड्यात सिनेमाने ४७.२५ कोटी रुपयांची कमाई केली. ही रक्कम जोडल्यास तान्हाजीची १० दिवसांतली एकूण कमाई १६२ कोटी रुपयांच्या घरात जात आहे.
तान्हाजीने गेल्यावर्षी रिलीज झालेल्या आणि चांगली कमाई केलेल्या सिनेमांना मात दिली आहे. मात्र अद्याप या सिनेमाने ‘कबीर सिंह’ सिनेमाचा रेकॉर्ड मोडलेला नाही. बॉक्स ऑफिस इंडियाच्या अहवालानुसार, तान्हाजी २०० कोटींच्या मार्क सहज पार करू शकेल.
‘तान्हाजी’ हा सिनेमा दुसऱ्या शुक्रवारी सर्वाधिक कमाई करणारा दहावा सिनेमा ठरला आहे. दिग्दर्शक ओम राऊत याच्या दिग्दर्शनाखाली बनलेला हा सिनेमा आहे. अक्षय कुमारची हाऊसफुल ४, गुड न्यूज, ऋतिक रोशनचा वॉर या सिनेमांना तान्हाजीने मागे टाकले आहे.