डोंबिवलीमध्ये लोकलमधून पडून एक तरुण गंभीर जखमी झाल्याची घटना घडलीय. ही घटना सकाळी पावणे दहाच्या सुमारास घडली. या घटनेत विशाल पांडुरंग गुरव हा तरुण जखमी झाला आहे.
डोंबिवलीच्या आझदे गावातील विशाल गुरव हा ३१ वर्षीय तरुण सकाळी ९.४० च्या सुमाराला धावत्या लोकलमधून खाली पडला. डोंबिवलीजवळच्या 47/25 या खांबाजवळ तो पडला. यात तो गंभीर जखमी झाला. त्याला तात्काळ शास्त्री नगर रुग्णालयात दाखल करण्यात आलं. विशालने जखमी असताना फोन करून भावाला कळवलं. त्याच्यावर सध्या उपचार सुरू आहेत.
गेल्याच महिन्यात डोंबिवलीजवळ लोकलमधून पडून तरुणीचा मृत्यू झाला होता. या घटनेत चार्मी प्रसाद या २२ वर्षीय तरुणीचा मृत्यू झाला होता. १६ डिसेंबरला ही घटना घडली होती. आता पुन्हा लोकलमधून तरुण पडल्याची घटना घडल्याने प्रवासी आणखी संतापले आहेत.
मुंबई सीएसएमटीला जाणाऱ्या लोकल ट्रेन या कल्याण, कसारा, कर्जतवरून येत असल्याने त्या आधीच गर्दी असते. अशावेळी डोंबवलीतील प्रवाशांना लोकलमध्ये चढण्यासाठी शर्थीचे प्रयत्न करावे लागतात. काही प्रवासी जीवावर उदार होऊन दाराला लटकून प्रवास करतात. यामुळे अनेकांचा तोल जाऊन ते लोकलमधून पडतात. यामुळे लोकलमधून प्रवासी पडण्याच्या घटना घडत आहेत. हे दुष्टचक्र गेल्या अनेक वर्षांपासून सुरू आहे. यापासून सुटका मिळावी यासाठी लोकलची संख्या वाढवाही अशी प्रवाशांची मागणी आहे. पण रेल्वे प्रशासनाने त्यावर कुठलीही तत्परता अद्याप दाखवलेली नाही.