चोरीला गेलेल्या मोबाइलमधून ‘फोन पे’ ॲपचा वापर करून सव्वादोन लाख रुपये काढण्यात आल्याचा प्रकार डोंगरीमधून उघडकीस आला आहे. विशेष म्हणजे एका पोलिसाच्याच खात्यामधून ही अफरातफर करण्यात आली आहे. याप्रकरणी डोंगरी पोलिस ठाण्यात गुन्हा दाखल करण्यात आला असून, संबंधित पोलिसाच्या मित्रानेच हे कृत्य केल्याचा संशय व्यक्त केला जात आहे.
सैन्यातून २०१०मध्ये निवृत्त झालेले वसंत माळी हे मुंबई पोलिस दलात भरती झाले. सशस्त्र दलात कार्यरत असलेल्या माळींना गावी जायचे असल्याने खरेदी करण्यासाठी ते डोंगरी येथील बाजारात गेले. यावेळी त्यांचा मोबाइल चोरीला गेला. खरेदी करीत असताना त्यांचा एक मित्रदेखील सोबत होता. गावाला जायची घाई असल्याने ते याबाबत तक्रार न करताच गेले. गावावरून परतल्यानंतर खोलीमध्ये राहणाऱ्या सहकार्याने त्यांना मोबाइल दिला. खरेदीदरम्यान असलेल्या मित्रानेच हा मोबाइल दिल्याचे त्याने सांगितले. दरम्यान मोबाइलमधील ‘फोन पे’ ॲप डिलीट झाल्याचे त्यांच्या लक्षात आले. त्यांनी हे ॲप पुन्हा डाऊनलोड केले असता त्याद्वारे ॲक्सिस बँकच्या खात्यातून एक लाख ४६ हजार व ‘बँक ऑफ इंडिया’च्या खात्यातून ७१ हजार काढल्याचे निदर्शनास आले.