दहा वर्षांपूर्वी ठाण्यातील भिवंडी तालुक्यात पोलिओचा शेवटचा रुग्ण आढळून आल्यानंतर जिल्ह्यात पल्स पोलिओ लसीकरणाची मोहीम अधिक व्यापक पद्धतीने राबविण्यात येत आहे. १९ जानेवारी रोजी होणाऱ्या पल्स पोलिओ मोहिमेत ठाण्यातील २ लाख ३ हजार ४५२ बालकांना लस देण्यात येणार आहे. यासह १८०० लसीकरण बुथ आणि ३११ जणांची टीम कार्यरत असणार आहे.
जिल्ह्यातील वैद्यकीय अधिकारी, तालुका आरोग्य अधिकारी यांना याबाबत प्रशिक्षण देण्यात आले असून १९ जानेवारीला रेल्वे स्थानक, बस स्थानक परिसरात ३११ जणांची टीम लसीकरण मोहीम राबविणार असल्याची माहिती मुख्य कार्यकारी अधिकारी हिरालाल सोनावणे यांनी दिली. जागतिक आरोग्य संघटनेने १९८८ मध्ये पोलिओचे समूळ उच्चाटन करण्याचे ध्येय निश्चित केले असून, त्या पार्श्वभूमीवर सातत्याने पल्स पोलिओ विशेष लसीकरण मोहिम राबविण्यात येत असल्याचे जिल्हा परिषद आरोग्य अधिकारी मनीष रेंघे यांनी सांगितले.