विरारमध्ये चोरी करण्यासाठी आलेल्या चार चोरांचा चोरीचा प्रयत्न फसला आहे. घरफोडी केल्यानंतर काहीही हाती न लागल्याने या चोरांना रिकाम्या हाताने परतावे लागले.
विरार पश्चिमेकडील दामोदर परिसरात उत्तरा सदन इमारत आहे. सोमवारी पहाटे चारच्या सुमारास चार चोर या इमारतीमध्ये आले. त्यानंतर सीसीटीव्हीमध्ये चेहरा दिसू नये यासाठी या इमारतीमध्ये दुसऱ्या मजल्यावर असलेल्या खासगी सीसीटीव्ही कॅमेऱ्यांवर काळ्या रंगाचा स्प्रे मारला. त्यानंतर या इमारतीमधील कोणीही रहात नसणाऱ्या दोन फ्लॅटचे कुलूप तोडून घरात प्रवेश केला. मात्र त्यांना घरामध्ये कोणतीही मौल्यवान वस्तू आढळून न आल्याने ते पसार झाले. यामध्ये चोर स्प्रे करतानाचा आणि शेवटी चार जण फरार होतानाचा सर्व प्रकार विविध सीसीटीव्हींमध्ये कैद झाला आहे. दुसऱ्या दिवशी सीसीटीव्हींमध्ये काळ्या रंगाचा थर दिसल्यानंतर ही घटना उघडकीला आली. याबाबत आजूबाजूच्या रहिवाशांनी त्या दोन्ही फ्लॅटमालकांशी तात्काळ संपर्क साधत या घटनेची माहिती दिल्यानंतर घराची तपासणी करण्यात आली. यामध्ये कोणत्याही प्रकारच्या वस्तू चोरी न झाल्याचे निष्पन्न झाले. याबाबत विरार पोलिसांना माहिती देण्यात आल्यानंतर पोलिसांनीदेखील घटनास्थळी येऊन पंचनामा केला आहे.