भिवंडी महापालिकेच्या दोन शाळांच्या इमारतींचे स्ट्रक्चरल ऑडिट झाले असून या शाळांच्या दुरुस्तीसाठी अनुक्रमे ४६ लाख आणि ८३ लाख इतका खर्च अपेक्षित आहे. मात्र, इतरही शाळांच्या इमारतींचे स्ट्रक्चरल ऑडिट करण्यात येणार असून त्यासाठी इंजिनीअरचे पॅनलही तयार केल्याची माहिती शिक्षण विभागातील अधिकाऱ्यांनी दिली.
भिवंडी महापालिकेच्या माध्यमिक विभागाच्या ११ आणि प्राथमिक विभागाच्या ९७ शाळा असून एकूण ४८ इमारतींमध्ये या शाळा भरतात. तसेच विद्यार्थ्यांची संख्या २६ हजार असल्याचे अधिकाऱ्यांचे म्हणणे आहे. परंतु पटसंख्येअभावी काही शाळा बंद झालेल्या असून ज्या काही शाळा आहेत त्यामध्येही सुविधांचा वानवा असल्याचे सांगितले जात आहे. इमारती जुन्या झालेल्या असून पिण्याच्या पाण्याचाही प्रश्न आहे. अशा स्थितीत विद्यार्थ्यांना शिक्षण घ्यावे लागत असल्याचे चित्र आहे. शाळांच्या इमारतीबाबत अहवाल तयार करण्याचे कामही शिक्षण विभागाने हाती घेतले असून प्रत्येक शाळेकडून याबाबतची माहिती मागवली आहे. परंतु दोन इमारती धोकदायक झाल्याने या इमारतीमधील विद्यार्थ्यांचे दुसऱ्या इमारतीमध्ये स्थलांतर करण्यात आले असून या दोन्ही इमारतींचे स्ट्रक्चरल ऑडिट करण्यात आले आहे. एका इमारतीचा दुरुस्तीचा खर्च ४६ लाख असून दुसऱ्या इमारतीचा दुरुस्तीचा खर्च ८३ लाख अपेक्षित धरण्यात आला आहे. शिवाय इतरही शाळांचे स्ट्रक्चरल ऑडिट करण्याचा निर्णय घेण्यात आला. याबाबत तयारी चालू केली असून ऑडिटसाठी इंजिनीअरचे पॅनल तयार केले आहे. प्रत्येक पॅनलला ऑडिटसाठी शाळा वाटून दिल्या जातील. ऑडिटनंतर इमारतीच्या दुरुस्तीविषयी निर्णय घेण्यात येईल, असेही अधिकारी सांगतात. परंतु पालिका शाळांमधील विद्यार्थी मूलभूत सुविधांपासून वंचित असल्याचे अधिकारी मान्य करतात. इमारती जुन्या असल्याने विद्यार्थ्यांच्या जीविताचाही प्रश्न निर्माण होऊ शकतो. त्यासाठी ऑडिट केले जात असल्याचेही अधिकारी सांगतात.