केरळमध्ये राहणाऱ्या एका महिलेने आपण सुप्रसिद्ध गायिका अनुराधा पौडवाल यांची कन्या असल्याचा दावा केला आहे. करमाला मोडेक्स असे या महिलेचे नाव असून, ती ४५ वर्षांची आहे. येथे आयोजित करण्यात आलेल्या पत्रकार परिषदेत करमाला यांनी हा दावा केला आहे.
मी अनुराधा पौडवाल यांची कन्या आहे. माझा जन्म १९७४ मध्ये झाला. अनुराधा पौडवाल यांनी मला जन्म दिला असून, कार्यक्रमांच्या व्यस्त आयोजनामुळे माझा सांभाळ त्यांनी केला नाही. आतापर्यंत माझा सांभाळ पौडवाल यांच्या मैत्रिणीने केला आहे, असा दावा या महिलेने केला आहे. याप्रकरणी कौटुंबिक न्यायालयात दावा दाखल करण्यात आला असून, अनुराधा पौडवाल यांच्या मालमत्तेत हिस्सा आणि ५० कोटी रुपयांची नुकसान भरपाई द्यावी, अशी मागणी या याचिकेत करण्यात आली आहे.
माझे खरे आई-वडील अनुराधा पौडवाल आणि अरुण पौडवाल आहेत. त्यांचा विवाह १९६९ मध्ये झाला होता. त्यानंतर १९७४ मध्ये माझा जन्म झाला. जन्माच्या चौथ्या दिवशी त्यांनी मला माझे आताचे पालक पोन्नाचन आणि एग्नेस यांच्याकडे सोपवले. कार्यक्रमांच्या व्यस्त नियोजनामुळे माझा सांभाळ करणे, त्यांना कठीण जात होते, असेही करमाला यांनी सांगितले.
पोन्नाचन आणि एग्नेस अनुराधा पौडवाल यांचे कौटुंबिक मित्र आहेत, अशी माहिती करमाला यांनी दिली. दरम्यान, अनुराधा पौडवाल बॉलिवूडमधील ख्यातनाम गायिका आहेत. ८० आणि ९० च्या दशकातील अनेक सुपरहिट गाण्यांना त्यांनी आपला आवाज दिला. चित्रपट गीतांसह अनुराधा पौडवाल यांनी गायलेली अनेक भजने प्रचंड मोठ्या प्रमाणात गाजली आहेत.