नौपाडा परिसरात सोनसाखळी आणि मोबाइल खेचणाऱ्या एका सराईत आरोपीला नौपाडा पोलिसांनी भिवंडीतील पिराणी पाड्यातून अटक केली आहे. यावेळी पोलिसांनी एका अल्पवयीन आरोपीला ताब्यात घेतले असून आरोपींच्या चौकशीत तीन गुह्यांची उकल झाली आहे.
काही दिवसांपूर्वी मोबाइल खेचण्याचे दोन आणि सोनसाखळी चोरीचा एक असे तीन गुन्हे नौपाडा पोलिस ठाण्याच्या हद्दीत घडले होते. सीसीटीव्ही फुटेज आणि तांत्रिक विश्लेषणाद्वारे आरोपींचा पोलिस शोध घेत होते. त्यावेळी आरोपी भिवंडीतील मोमिनपुरा येथील पिराणी पाड्यात असल्याची माहिती पोलिसांना मिळाली. पोलिसांनी तिकडे धाव घेत आरोपीला पकडण्यासाठी सापळा लावला. तत्पूर्वी पोलिसांनी आरोपीची संपूर्ण माहिती काढली होती. पहाटे ४. ३० ते सकाळी १० वाजेपर्यंत पोलिस आरोपीला पकडण्यासाठी दबा धरून बसले होते. अब्बास शब्बेर जाफरी (२१) याच्यासह त्याचा १५ वर्षांचा साथीदार अशा एकूण दोघांना ताब्यात घेतल्याची माहिती पोलिस उप निरीक्षक विनोद लभडे यांनी दिली. अल्पवयीन आरोपीची रवानगी भिवंडी बालसुधारगृहात करण्यात आली आहे. जाफरी याला न्यायालयाने सहा दिवसांची पोलिस कोठडी दिली आहे. या आरोपींकडून सोन्याची साखळी आणि आठ मोबाइल असा एकूण १ लाख ६३ हजार ५०० रुपयांचा ऐवज हस्तगत करण्यात आला आहे.