येथील गट क्रमांक ८०मध्ये एका पाच वर्षांच्या मुलावर मोकाट कुत्र्याने हल्ला केल्याची घटना शुक्रवारी दुपारी घडली. पीयूष रवींद्र काकडे असे जखमी मुलाचे नाव आहे.
मशीद गल्लीत शाळेतून पीयूष घरी आल्यावर दुपारी दीड दोनच्या सुमारास खेळत होता. यावेळी मागून आलेल्या कुत्र्याने दोन ठिकाणी चावा घेत त्याला जबर जखमी केले. पीयूषला घाटी रुग्णालयात भरती करून रेबीज इंजेक्शन देऊन उपचार करण्यात आले. दरम्यान, या वसाहतीत बाहेरून पकडून आणलेले मोकाट कुत्रे सोडून देण्यात येत असल्याने रहिवाशांनी झालेल्या घटनेस महापालिकेला जबाबदार ठरविले आहे. महापालिका एकीकडे फक्त कर वसुली करण्यात मग्न असून मोकाट कुत्र्यांनी धुमाकूळ घालूनही त्यांना पकडले जात नसल्याचे सातारा-देवळाई संघर्ष समितीचे सोमिनाथ शिराणे यांनी सांगितले. देवळाईत चंद्रकला शहाणे या ५५ वर्षीय महिलेवर मोकाट कुत्र्याने हल्ला करत गुडघ्याचा चावा घेण्याची घटना ताजी असतानाच पुन्हा हा प्रकार घडला आहे.