मराठमोळा, सर्वांना परवडणारा आणि अनेकांचे जगण्याचे साधन बनलेल्या बटाटावड्याला जागतिक दर्जा मिळवून देण्याचा ध्यास घेतलेले सत्येंद्र जोग आज, शनिवारी या बटाटावड्याची लिम्का बुकात नोंद करणार आहेत.
डोंबिवली जिमखान्याच्या वतीने आयोजित ‘उत्सव’च्या व्यासपीठावरून प्रसिद्ध शेफ सत्येंद्र जोग शनिवार, २८ डिसेंबर रोजी २५ हजार बटाटेवडे तळण्याचा विक्रम करणार असून ‘लिम्का बुक ऑफ वर्ल्ड रेकॉर्ड’कडून त्यांच्या या उपक्रमाची नोंद घेतली जाणार आहे. मागील १५ वर्षांपासून उपाहारगृह सल्लागार म्हणून काम करणाऱ्या जोग यांनी ठाणे, मुंबई, पुणे, नाशिक व इंदूर या ठिकाणी काम केले आहे. एक मराठी भाषिक असल्यामुळे मराठमोळ्या बटाटावड्याला जागतिक कीर्ती मिळवून देण्यासाठी काय करता येईल, यावर विचार करताना त्यांना ही अभिनव कल्पना सुचली. प्रत्येक मराठी मनावर अधिराज्य गाजवणारा, सर्वसामान्यांना परवडणारा आणि अनेकांचे जगण्याचे साधन बनलेल्या या बटाटावड्याला मानाचे पान मिळवून देण्यासाठी त्यांनी कंबर कसली आहे.
शनिवारी सकाळी १० वाजता १ हजार ५०० किलो बटाटे, ५०० लिटर तेल, ३५० किलो बेसन आणि अन्य साहित्य तसेच, ७० ते ८० जणांची टीम ‘उत्सव’च्या व्यासपीठावरून या विक्रमासाठी शुभारंभ करणार असून जोग हे सहकाऱ्यांच्या मदतीने तयार केले जाणारे २५ हजार बटाटेवडे तब्बल १२ तास तापलेल्या तेलाच्या कढईसमोर उभे राहून तळणार आहेत. तासाला २५०० बटाटेवडे असे उद्दिष्ट त्यांनी ठेवले असून या उपक्रमाला येणारा सुमारे १० लाख रुपयांचा खर्च उचलण्यासाठी डोंबिवलीतील अनेक दानशूर व्यक्तींनी आर्थिक मदतीचा हात दिला आहे. रात्री १० वाजता प्रसिद्ध अभिनेते गिरीश ओक यांच्या हस्ते या ‘रेकॉर्ड वीरा’चा सन्मान केला जाईल. ‘उत्सव’च्या आयोजकांकडूनही हे रेकॉर्ड पूर्ण व्हावे, यासाठी सर्वतोपरी मदत केली जात आहे.