तब्बल ५० वर्षे व्यगंचित्रकलेची अव्याहतपणे सेवा करणारे व राजकीय व्यंग अचूकपणे हेरून कुंचल्याचे चौफेर फटकारे मारणारे ज्येष्ठ राजकीय व्यंगचित्रकार विकास सबनीस यांचे आज रात्री दहाच्या सुमारास मुंबईत अल्पशा आजाराने निधन झाले. ते ६९ वर्षांचे होते.
विकास सबनीस गेला आठवडाभर रुग्णालयात उपचार घेत होते. अधिक तपासणीसाठी त्यांना माहीम येथील रुग्णालयात नेण्यात आले होते. मात्र तिथेच त्यांना हृदयविकाराचा झटका आला व त्यांचे निधन झाले. त्यांच्या पार्थिवावर शनिवारी अंत्यसंस्कार करण्यात येणार आहेत, असे सांगण्यात आले. सबनीस यांचे पार्थिव त्यांच्या निवासस्थानी अंत्यदर्शनासाठी ठेवण्यात येणार आहे.
५० वर्षे चालला कुंचला
सबनीस यांच्या व्यंगचित्र कारकीर्दीला यंदाच ५० वर्षे पूर्ण झाली होती. त्यानिमित्त २० फेब्रुवारी रोजी शिवाजी पार्क येथील सावरकर सभागृहात आयोजित ‘रेषा विकासची, भाषा ५० वर्षांची’ या विशेष कार्यक्रमात त्यांचा गौरव करण्यात आला होता. १९६८ पासून अव्याहतपणे त्यांनी व्यंगचित्रकलेची साधना केली. टाइम्स ऑफ इंडियामध्ये आर. के. लक्ष्मण यांची आणि मार्मिकमध्ये बाळासाहेब ठाकरे यांची व्यंगचित्रे पाहून ते प्रभावित झाले. बाळासाहेब ठाकरे यांच्या व्यंगचित्रांमागचा राजकीय विचार आणि त्यामागील विचारशक्ती पाहून आकर्षित झाल्याने त्यांनी राजकीय व्यंगचित्रकार होण्याचा निर्णय घेतला होता.