धावत्या लोकलमधून तोल जाऊन पडल्याने ४९ वर्षीय महिला जखमी झाल्याची घटना शुक्रवारी घडली. सीताबाई अभंगे असे या महिलेचे नाव असून तिच्यावर राजावाडी रुग्णालयात उपचार सुरू आहेत.
‘पवई येथे राहणाऱ्या सीताबाई आपल्या पतीसोबत ठाणे ते कांजुरमार्ग असा प्रवास करत होत्या. दुपारी तीन वाजण्याची वेळ असल्याने लोकलमध्ये गर्दी कमी होती. कांजुरमार्ग स्टेशन येण्यापूर्वी सीताबाई यांना मळमळू लागल्याने त्या दरवाजाजवळ गेल्या. यावेळी तोल गेल्यामुळे धावत्या लोकलमधून त्या थेट रेल्वे रुळांवर पडल्या’, अशी माहिती कुर्ला रेल्वे पोलिस ठाण्याचे वरिष्ठ पोलिस निरीक्षक एम. इनामदार यांनी दिली.
रुळांवर महिला जखमी अवस्थेत पडल्याची माहिती मिळताच कुर्ला रेल्वे पोलिस ठाण्याच्या कर्मचाऱ्यांनी तत्काळ घटनास्थळी धाव घेतली. जखमी सीताबाई यांना तातडीने राजावाडी रुग्णालयात दाखल करण्यात आले. त्यांच्यावर राजावाडी रुग्णालयातील अतिदक्षता विभागात उपचार सुरू असल्याचे कुर्ला पोलिसांनी स्पष्ट केले.