विंग कमांडर (निवृत्त) अनिल अमरेंद्र गाडगीळ (वय ७२) यांचे अल्पशा आजाराने निधन झाले. त्यांच्यामागे पत्नी कविता गाडगीळ आणि पुत्र केदार गाडगीळ असा परिवार आहे. अखिल भारतीय मराठी बालकुमार साहित्य संमेलन संस्थेचे संस्थापक अमरेंद्र गाडगीळ यांचे अनिल हे पुत्र होत.
अनिल गाडगीळ यांचा जन्म १३ मार्च १९४७ रोजी झाला होता. बालपणापासून हवाई दलामध्ये जाण्याचे स्वप्न १९६७ मध्ये पूर्ण झाले. बांगला देश मुक्तीमध्ये सहभाग घेतलेल्या गाडगीळ १९८४ मध्ये विंग कमांडर पदावरून निवृत्त झाले. त्यानंतर गाडगीळ यांनी एअर इंडियामध्ये सेवा केली. त्यांचा मुलगा अभिजित याचा मिग २१ विमान अपघातामध्ये दुर्दैवी मृत्यू झाल्यानंतर गाडगीळ यांनी पत्नी कविता गाडगीळ यांच्यासमवेत ‘एअर सेफ्टी फाउंडेशन’ची स्थापना केली. या संस्थेमार्फत वैमानिकांना सुरक्षित हवाई उड्डाणाचे प्रशिक्षण देण्याचे काम त्यांनी केले.