बेस्टने साध्या बसचे तिकीट पाच, तर एसीचे तिकीट सहा रुपये केल्याने उपक्रमाच्या पारड्यात सुट्या पैशांचा अक्षरश: वर्षाव होऊ लागला आहे. बेस्टने तिकीट कपातीचा निर्णय अंमलात आणल्यानंतर प्रवासी तिकिटासाठी सुट्टे पैसे देऊ लागले आहेत. यापूर्वी बेस्टकडे दररोज साधारणत: चार लाख रुपयांची नाणी जमा होत असत. आज ही रक्कम जवळपास चारपटीने वाढून १२ लाखांच्या घरात पोहोचली आहे. यामध्ये मुख्यत: एक, पाच आणि दहा रुपयांच्या नाण्यांचा समावेश आहे.
दरदिवशी १२ लाख
बेस्टच्या दिवसभरातील तिकिटांच्या उलाढालीत दररोज जवळपास १२ लाख रुपयांची नाणी जमा होत आहे. ही नाणी दररोज बँकेत जमा केली जातात. त्यामुळे नाण्यांमुळे दररोजच्या व्यवस्थापनात अडचणी येत नाहीत. मात्र भविष्यात बसताफा वाढलल्यानंतर आणखी मोठ्याप्रमाणात नाणी जमा होतील, असेही सांगितले जाते. एसी बसचे कमाल तिकीट सहा रुपये आहे. या बसचीही संख्या भविष्यात मोठ्या प्रमाणात वाढणार असल्याने त्यानुसार खजिन्यात जादा नाणी जमा होतील. तेव्हाही उपक्रमाला सुट्या नाण्यांचे व्यवस्थापन करण्याची कसरत करावी लागणार आहे.