तरुणीने लग्नास नकार दिल्याने तिला बळजबरीने रिक्षात ओढून, ‘लग्नास होकार दे नाही, तर तुझ्यासह तुझ्या घरच्यांना ठार मारेन’ अशी धमकी देऊन प्रियकराने प्रेयसीच्या छातीवर व पाठीवर चाकूने वार केल्याची खळबळजनक घटना मुंढवा परिसरात घडली. याबाबत मुंढवा पोलिस ठाण्यात तिघांविरोधात गुन्हा दाखल करण्यात आला आहे.
प्रसाद रमेश सोनवणे (वय ३१, रामटेकडी, हडपसर) असे मुख्य आरोपीचे नाव असून, त्याच्यासह रिक्षाचालक नदीम शेख (वय २८, रा. रामटेकडी) आणि चंदन चव्हांडके (वय ३०, रा. कोंढवा) यांच्याविरोधात गुन्हा दाखल करण्यात आला आहे. याबाबत तरुणीने मुंढवा पोलिस ठाण्यात फिर्याद दिली आहे.
मुंढवा पोलिसांनी दिलेल्या माहितीनुसार, प्रसाद सोनावणे व अपहरण केलेली तरुणी यांच्यात मागील सात-आठ वर्षांपासून प्रेमसंबंध होते. मागील पाच-सहा महिन्यांपासून प्रसाद हा तरुणीला दारू पिऊन मारत असल्याने तरुणीने प्रसादसोबत बोलणे बंद केले होते. तरुणी गुरुवारी सायंकाळी साडेसातच्या सुमारास मुंढवा रेल्वे पुलापासून कामावरून घरी जाण्यास निघाली होती. या वेळी तिचा प्रियकर प्रसाद हा नदीम शेख व चंदन चव्हांडके या मित्रांसोबत रिक्षा घेऊन तेथे थांबला होता. तरुणी तेथे येताच प्रसादने तिला बळजबरीने रिक्षामध्ये बसवले. रिक्षा हडपसर औद्योगिक वसाहतीमध्ये नेण्यात आली. यादरम्यान प्रसादने प्रेयसीला लग्न करण्याची मागणी केली. मात्र, तरुणीने नकार दिल्याने प्रसादने चाकूने तिच्या छातीवर व पाठीवर वार केले. यानंतर घाबरून तरुणीने लग्नास होकार दिला. यानंतर प्रसादने तरुणीला जखमी अवस्थेत स्वतःच्या घरी नेले आणि आई संगीतासोबत भेट घालून दिली. यादरम्यान तरुणीच्या मोठ्या बहिणीचा फोन आल्याने तरुणीने ही घटना तिला सांगितली. यानंतर तरुणीच्या बहिणीने प्रसादच्या घरी जाऊन तिची सुटका केली. यानंतर त्यांनी हडपसर पोलिस ठाण्यात तक्रार दिली. सध्या तरुणीवर खासगी रुग्णालयात उपचार सुरू आहेत. आरोपी फरारी असल्याचे मुंढवा पोलिस ठाण्याचे सहायक पोलिस निरीक्षक एम. एम. पाटील यांनी सांगितले.