कनिष्ठ कर्मचाऱ्यांच्या सुट्टीच्या अर्जावर निर्णय न घेणे वरिष्ठ अधिकाऱ्यांना महागात पडले आहे. मुंबई महापालिका कर्मचाऱ्यांच्या सुट्टीच्या अर्जांवर निर्णय न घेणाऱ्या जवळपास २००० वरिष्ठ अधिकाऱ्यांचा पगार कापण्यात आला आहे. महापालिका आयुक्त प्रवीण परदेशी यांच्या आदेशानंतर हा निर्णय घेतला आहे. कर्मचाऱ्यांच्या सुट्टीबाबत निर्णय घेतल्यानंतर पुढील महिन्याच्या पगारात रोखून ठेवलेला पगार जमा करण्यात येणार आहे.
बायोमेट्रिक मशीनद्वारे हजेरीची सुविधा सुरू झाल्यानंतर कर्मचाऱ्यांना सुट्टीसाठी रितसर अर्ज करावा लागत आहे. ती मंजूर झाल्यानंतर त्यानुसार पगार दिला जातो. सुट्टीवर निर्णय झाला नाही तर, सुट्टीच्या अर्जात उल्लेख नमूद केलेल्या दिवसांचा पगार कापला जातो. मात्र, यावेळी यावेळी सुट्टीबाबत निर्णय न घेणाऱ्या अधिकाऱ्यांवरच कारवाईची कुऱ्हाड कोसळली आहे. दरम्यान, पगार कापल्यानंतर बीएमसीचे अॅप डाउनलोड करण्याचे प्रमाण वाढले आहे. मोबाइलमध्ये डाउनलोड केलेल्या अॅपद्वारे अधिकारी सुट्टी मंजूर करू शकतात. याशिवाय मोबाइलवर कार्यालयीन इ-मेल आयडी जोडण्याचे निर्देशही देण्यात आले आहेत. त्यामुळे इ-मेलद्वारे पाठवलेले मेसेज तात्काळ अधिकाऱ्यांपर्यंत पोहचण्यास मदत होईल.