हत्येच्या गुन्ह्यातील आरोपीला कारागृहात चांगली वागणूक देण्यासह अन्य कामांसाठी लाच घेणारा तळोजा मध्यवर्ती कारागृहातील पोलिस हवालदार प्रदीप निंबाळकर याने अगोदरच्या निमरे या आडनावाने लाचेची मागणी केली होती. दोन वर्षांपूर्वीच त्याने आडनाव बदलले होते. लाच घेताना पकडला गेल्यानंतर त्याने आपले आताचे आडनाव एसीबीच्या अधिकाऱ्यांना सांगितल्याची माहिती पुढे आली आहे.
रियल इस्टेट एजंट असलेल्या महिला तक्रारदाराच्या भावाविरुद्ध खारघर पोलिस ठाण्यात हत्येचा गुन्हा दाखल आहे. सध्या हा आरोपी तळोजा मध्यवर्ती कारागृहात आहे. अलिबाग न्यायालयात असलेला हा खटला पनवेलच्या विशेष न्यायालयात वर्ग करण्यात आला. मात्र एकदाच सुनावणी झाली असून याच कारागृहातील हवालदार प्रदीप निंबाळकर याने तक्रारदार महिलेला निमरे या नावाने फोन करून खटल्याच्या तारखा बंद करू. मुलाखतीच्या वेळी भेटू तसेच चांगली वागणूकही न देण्याबाबत सांगितले होते. मात्र चांगली वागणूक मिळावी तसेच केसच्या तारखाही चालू ठेवण्यासाठी प्रदीपने आरोपीच्या बहिणीकडे ५० हजारांची मागणी केली होती. याबाबत व्हॉट्सअॅपवर व्हॉइस कॉलिंग करण्यात आले होते. प्रदीपने पुन्हा फोन करत सात हजार रुपये घेऊन येण्याबाबत सांगितले. कारण तो गावी जाणार होता. तक्रारदार महिलेने ठाणे एसीबीकडे धाव घेत निमरेबाबत तक्रार केली. एसीबीने सापळा लावून पाच हजारांची लाच घेताना निमरे याला पकडले. एसीबीच्या अधिकाऱ्यांनी निमरेला नाव विचारल्यानंतर त्याने प्रदीप निंबाळकर नाव असल्याचे सांगितले. याप्रकरणी खारघर पोलिस ठाण्यात गुन्हा दाखल करण्यात आला.
कामाच्या ठिकाणी निंबाळकर या आडनावाऐवजी निमरे या आडनावाने ओळखत असल्याची माहिती एसीबीच्या एका अधिकाऱ्याने दिली. निमरे म्हणूनच त्याला हाक मारली जात आहे. निमरे वाडी असून दोन वर्षांपूर्वी प्रदीपने आपले आडनाव बदलत निंबाळकर केल्याचेही या अधिकाऱ्याने सांगितले. त्यामुळे लाचेची मागणी करताना निमरे आडनावाचा त्याने आधार घेतला होता.