कळव्यातून बेपत्ता झालेल्या महिलेचे अखेर गूढ उकलले असून तब्बल दोन महिन्यानंतर ही महिला घरी परतली आहे. मात्र, या महिलेला भयानक त्रासाला सामोरे जावे लागले असून काम लावून देण्याच्या भूलथापा मारून एका महिलेने पीडित महिलेला सूरतला घेऊन जात घरकामास जुंपले. तिच्या अंगावरील दागिने काढून घेत पुन्हा कळव्यात आल्यानंतरही घरात डांबून ठेवले होते. अखेर जिवाच्या आकांताने महिलेनेच घरातून पळ काढत स्वतःची सुटका केली असून तिला त्रास देणाऱ्या आरोपी महिलेला कळवा पोलिसांनी अटक केली आहे.
कळव्यातील सुदामानगरमध्ये पीडित ४० वर्षांची महिला राहत असून २५ मे रोजी दुपारी घरातून बाहेर आलेली ही महिला येथील ज्यूस सेंटरजवळ थांबली होती. त्यावेळी तिची तोंडओळख असलेल्या महिलेने या महिलेला काम लावून देते असे सांगून रिक्षात बसवले. पीडितेकडून मोबाइलही खेचून घेतला. शुद्ध हरपली. शुद्ध आल्यानंतर ती एक्स्प्रेसमध्ये होती. रात्री सुरतला पोहोचल्यानंतर आरोपीने या महिलेला तिच्या घरी नेले. घरातील कामे करण्यास तिला जबरदस्ती करू लागली. तसेच मारहाणही करत होती. आरोपी महिलेने तिच्याकडील दोन हजार रुपये आणि दागिने काढून घेतले. १० ते १२ दिवस या महिलेला सुरतला ठेवल्यानंतर कळव्यात आणले. मात्र घरी सोडले नाही. आरोपीने महिलेला कळव्यातील स्वतःच्या घरी डांबून ठेवले होते. घरातील काम करण्यास नकार दिल्यानंतर मारहाणही करत होती. १९ जुलै रोजी सकाळी ही महिला घरातून पळाली आणि घरी परतली.