वेश्याव्यवसाय आणि डान्सबारच्या दलदलीत ढकलण्यासाठी एका पंधरा वर्षांच्या मुलीला सिगारेटचे चटके दिले जात असल्याचा धक्कादायक प्रकार उघड झाला आहे. कुर्ला स्थानकावर ही अल्पवयीन मुलगी सापडल्यावर ही माहिती समोर आली. सावत्र वडील आणि भावाकडून लैगिंक अत्याचारही या मुलीवर करण्यात आले आहेत. याप्रकरणी नागपाडा पोलिस ठाण्यात गुन्हा दाखल करण्यात आला आहे.
एक १५ वर्षांची मुलगी कुर्ला रेल्वे स्थानकावर जखमी अस्वस्थेत असून ती गरोदर असल्याची माहिती एका सामाजिक संस्थेला मिळाली. या संस्थेने तिच्याकडे विचारपूस केल्यानंतर तिने सावत्र आई कोठ्यावर वेश्याव्यवसाय करत असल्याचे सांगितले. मलाही तिने वेश्याव्यवसाय करण्यास भाग पडल्याचे ही मुलगी म्हणाली. तसेच सावत्र वडील आणि भावाने वारंवार लैगिक अत्याचार केल्याची माहिती तिने दिले. यातूनच गरोदर राहिल्याने तिला घरातून हाकलून दिले.
मुंबईत कुठेच आसरा नसल्याने ही मुलगी फिरत फिरत कुर्ला स्थानकावर पोहोचली. गरोदरपणामुळे तिला अशक्तपणा आला होता. सामाजिक संस्थेने ही माहिती प्रथम भोईवाडा पोलिसांना दिली. चौकशीमध्ये ही मुलगी मुबई सेंट्रल येथील अलेक्झांडर सिनेमागृहाजवळ राहत असल्याचे स्पष्ट झाल्यानंतर हा गुन्हा नागपाडा पोलिस ठाण्यात वर्ग करण्यात आला आहे. नागपाडा पोलिस याप्रकरणाचा तपास करत आहेत. या मुलीप्रमाणेच या ठिकाणी अन्य काही अल्पवयीन मुलींवर जबरदस्ती केली जात असल्याची शक्यताही व्यक्त करण्यात येत आहे.