एका वेडसर तरुणाच्या आत्महत्येच्या प्रयत्नामुळे पश्चिम रेल्वे रविवारी एक तास बंद पडली होती. मालाड रेल्वे स्थानकावर रविवारी सकाळी ही घटना घडली. हा तरुण ९च्या सुमारास मालाड स्थानकाच्या उत्तरेकडे असलेल्या पुलावर चढला. त्यामुळे अप व डाऊन या दोन्ही मार्गावरील वीज प्रवाह तात्काळ बंद करावा लागला. ९.०५ वाजता अग्नीशमन दलाला पाचारण करण्यात आले. त्याची समजूत काढण्यासाठी जवळपास एक तास लागला. अग्नीशमन दलाच्या जवानांनी १०.११ वाजता त्याला सुखरुप खाली उतरवले. त्यानंतर १०.१४ वाजता वीज प्रवाह पूर्ववत करण्यात आला. यादरम्यान तीन लोकल रद्द कराव्या लागल्या. अनेक गाड्यांना विलंब झाला. युवक वेडसर असल्याने स्वत:चे नावदेखील सांगू शकत नसल्याचे रेल्वे पोलिसांनी सांगितले.