पुणे-नाशिक महामार्गावरील चंदनापुरी घाटात शुक्रवारी (१२ जुलै) रात्री आकराच्या सुमारास पुन्हा एकदा मोठी दरड कोसळली. आठवडाभरात तिसऱ्यांदा दरड कोसळल्यामुळे नाशिककडे जाणारी वाहतूक सारखी विस्कळित होत आहे. सुदैवाने या दुर्घटनेत कसलेही नुकसान झालेले नाही. दरड कोसळल्याने महामार्गावरील वाहतूक तूर्तास एकेरी सुरु आहे.
दरड कोसळल्याची माहिती मिळताच रात्री पोलीस, महामार्ग कर्मचारी व महसूल विभागाचे कर्मचारी घटनास्थळी दाखल झाले. घाट परिसरात आठवड्यापासून पावसाची संततधार सुरु आहे. पावसामुळे चंदनापुरी घाटात डोंगराचा काही भाग संरक्षक जाळ्यासह नाशिककडे जाणाऱ्या लेनवर मधोमध कोसळला. सुदैवाने या घटनेत कसलीही हानी झाली नाही. जिल्हाधिकारी राहुल द्विवेदी यांनीही या घटनेची माहिती घेतली असून दरड हटवण्याचं काम सध्या युद्धपातळीवर सुरू आहे.
दरड कोसळल्याने महामार्गावरील वाहतूक तूर्तास एकेरी सुरु असल्याने प्रवाश्यांचे अतोनात हाल होत आहेत. आठवडाभरात तिसऱ्यांदा दरड कोसळल्यामुळे नाशिककडे जाणारी वाहतूक सारखी विस्कळित होत आहे. आज सकाळी साडेआठच्या सुमारास जेसीबीच्या सहाय्याने दरड हटवण्याचे काम सुरू करण्यात आले आहे. घाट परिसरातून प्रवास करताना वाहन चालकांना जीव मुठीत धरुन प्रवास करावा लागतो आहे.