मरिन ड्राइव्हजवळ समुद्रात शनिवारी दुपारी बुडालेल्या १४ वर्षीय साहिल खानचा मृतदेह अखेर २४ तासांनंतर सापडला. त्याचा मृतदेह जीटी हॉस्पिटलमध्ये नेण्यात आला. विच्छेदनानंतर मृतदेह त्याच्या कुटुंबीयांकडे सोपवण्यात आला.
नागपाड्यातील पालिकेच्या शाळेत आठवीत शिकणारा साहिल शाळा सुटल्यानंतर मित्रांसोबत मरिन ड्राइव्ह येथे समुद्राकिनारी फिरायला गेला होता. त्याचवेळी उसळणाऱ्या लाटेसोबत तो समुद्रात ओढला गेला. त्याला वाचवण्यासाठी २६ वर्षांच्या जावेद खाननं समुद्रात उडी घेतली. मात्र, तोही बुडाला. पोलीस आणि नौदलाचे जवान घटनास्थळी पोहोचले. त्यांनी तातडीने बचावकार्य हाती घेतलं. शनिवारी संध्याकाळी सव्वासातच्या सुमारास जावेदचा मृतदेह सापडला. समुद्राला भरती असल्यामुळं बचावकार्यात अडथळा निर्माण झाला होता. रविवारी सकाळी पुन्हा बचावकार्याला सुरुवात झाली. अखेर दुपारी पावणेदोनच्या सुमारास तारापोरवाला मत्स्यालयाजवळ साहिलचा मृतदेह सापडला, अशी माहिती मरिन ड्राइव्ह पोलिसांनी दिली.