सबका साथ, सबका विकास’ असं म्हणणाऱ्या मोदी सरकारचा दुसऱ्या कार्यकाळातील पहिला अर्थसंकल्प आज संसदेत सादर करण्यात आला आहे. पहिल्या अर्थसंकल्पात नोकरदारांना फारसा दिलासा मिळाला नसल्याचे चित्र आहे. पेट्रोल आणि डिझेलच्या एक्साईज ड्युटीत (अतिरिक्त कर) प्रत्येकी एक-एक रुपयांची वाढ करण्यात आल्याने पेट्रोल-डिझेलच्या किंमती वाढणार आहेत. तसेच सोने-चांदीच्या सीमाशुल्कात २ टक्के वाढ करण्यात आल्याने सोनेही महागणार आहे.
देशाची पहिली महिला केंद्रीय अर्थमंत्री निर्मला सीतारामण यांनी अर्थमंत्री म्हणून आपला पहिला अर्थसंकल्प आज संसदेत सादर केला. मोदी सरकार दुसऱ्यांदा पूर्ण बहुमताने केंद्रात सत्तेत आल्यानंतर या सरकारकडून नोकरदारांच्या मोठ्या आशा पल्लवित झाल्या होत्या. परंतु, त्या फोल ठरल्याचे दिसले. पाच लाखांवरील वार्षिक उत्पन्न असणाऱ्या नोकरदारांना प्राप्तिकर लागू करण्यात आल्याने त्यांना फारसा दिलासा मिळाला नाही. सोने-चांदीचे शुल्क वाढवण्यात आले असून १० टक्क्याऐवजी ते आता १२.५ टक्के इतके करण्यात आले आहे. त्यामुळे सोने-चांदीच्या वस्तू महागणार आहे. पेट्रोल-डिझेलच्या अतिरिक्त करात प्रत्येकी एक-एक रुपयांची वाढ करण्यात आल्याने पेट्रोल-डिझेलच्या दरात वाढ होणार आहे. तंबाखूच्या अतिरिक्त शुल्कात वाढ करण्यात आल्याने तंबाखूचे दरही वाढणार आहेत.
जास्तीची कमाई करणाऱ्यांना मोदी सरकारने जोरदार झटका दिला आहे. वार्षिक २ ते ५ कोटी रुपयांची कमाई करणाऱ्या व्यक्तींना आता अधिकचा ३ टक्के सरचार्ज द्यावा लागणार आहे. ५ कोटी रुपयांपेक्षा अधिक कमाई केल्यास ७ टक्के सरचार्ज द्यावा लागणार आहे. वर्षभरात बँकेतून १ कोटी रक्कम काढल्यास त्यावर २ टक्के टीडीएस द्यावा लागणार आहे. तसेच वर्षभरात २ कोटी रक्कम काढल्यास २ लाख रुपये दयावे लागणार आहे.