तीन मुलांच्या पालनपोषणाचा खर्च झेपत नाही म्हणून आईने दहा महिन्यांच्या मुलाला हजीअलीच्या दर्ग्यात सोडल्याचा धक्कादायक प्रकार उघडकीस आला आहे. ताडदेव पोलिसांनी अवघ्या ४८ तासांत त्याच्या आईला शोधून काढले. रेश्मा सलीम शेख असे या महिलेचे नाव असून ताडदेव पोलिसांनी तिला गुरुवारी अटक केली.
हाजीअली येथील दर्ग्यामध्ये बुधवारी दुपारी बाराच्या सुमारास एक मुलगा रडत असल्याचे काही जणांना दिसले. याबाबतची माहिती मिळताच ताडदेव पोलिसांचे पथक घटनास्थळी पोहोचले आणि त्याच्या आईचा शोध सुरू केला. वरिष्ठ पोलिस निरीक्षक संजय सुर्वे यांच्या मार्गदर्शनाखाली उपनिरीक्षक टेकवडे यांच्या पथकाने दर्ग्यासह परिसरातील सर्व सीसीटीव्हींचे फूटेज तपालसे. त्यावेळी एक महिला मुलाला ठेवून कामाठीपुराच्या दिशेने जात असल्याचे निदर्शनास आले. पोलिसांनी कामाठीपुरातील एका चाळीतून रेश्मा हिला ताब्यात घेतले. तीन मुलांच्या पालनपोषणाचा खर्च परवडत नसल्याने छोट्या मुलाला दर्ग्यात सोडल्याचे तिने चौकशीमध्ये सांगितले.